Oil price hike sinisi sa inflation
MANILA, Philippines — Sinisi kamakalawa ni Pangulong Rodrigo Duterte sa pagtaas ng inflation sa bansa ang pagtaas ng presyo ng langis na umaabot sa P57 kada litro ng premium nitong linggong ito.
“Ano ang nagtutulak sa inflation ngayon? Simple, iyang presyo ng langis,” sabi ng Pangulo sa kanyang talumpati sa Asia-Pacific Association of Gastroenterology 3rd Inflammatory Bowel Disease Clinical Forum sa Cebu City noong Biyernes ng gabi.
“Dati, 43 siya. Ngayon, 100 bawat barrel na. Mahigit nang 100 per barrel. Ibig kong sabihin, umuwi ka, gamitin mo ang kotse at lahat ng bagay, iyong aircon, langis iyan.
Lahat ay nasa langis,” patungkol niya sa presyo ng langis sa pandaigdigang pamilihan.
Noong Agosto, umakyat sa 6.4 percent ang inflation sa Pilipinas. Nalagpasan nito ang 5.9 percent na tinaya ng Department of Finance at ng polls ng Bloomberg at Reuters.
“Tignan ninyo ang lahat ng narito. Ang mikroponong ito, ang aklat na ito, ang baso ng tubig na ito, ang inyong suot, konektado sa langis. Dahil gawa sila sa mga makina at equipment,” dagdag pa niya.
- Latest
