P55 B ‘pork’ ng House hahanapin ni Lacson
MANILA, Philippines — Tiniyak kahapon ni Sen. Panfilo Lacson na bubusisiin at hahanapin niya kung saan itinago o isiningit sa budget ng House of Representatives ang diumano’y P55 bilyong pork barrel funds sa sandaling ipadala na sa Senado ang bersiyon ng panukalang P32.757 trilyong Government Appropriations Act (GAA) para sa 2019.
Ginawa ni Lacson ang pahayag matapos mapaulat na hindi umano tinanggal ng mga kaalyado ni dating Pangulo at ngayon ay House of Representatives Gloria Macapagal-Arroyo ang P55 bilyon na inilaan noong termino pa ni dating Speaker Pantaleon Alvarez at sa halip ay ini-realigned lamang ito.
Sinabi ni Lacson na dahil sa nangyari sa Kamara, mas mapapadali ang kanilang paghahanap kung saan itinago ang nasabing P55 bilyon.
“Natutukoy, pero napakahirap. Talagang pagpapaguran at pagpupuyatan. Pero ngayon dahil sa nangyari kahapon sa Kamara medyo sa isang banda nagpapasalamat kami. Tuwa nga staff ko kasi medyo napadali ang trabaho. P55.555 billion na projects yan. Ang kabuuan magbubuo ng P55 billion budget ng DepEd at DoTr, mga airport. So yan medyo more or less lumiwanag at madali-daling maghanap ngayon,” sabi ni Lacson.
Ang isiningit umanong P55 bilyon ang dahilan kung bakit nagkakaroon ng gulo ang ilang kongresista sa Kamara.
Nabalam ang debate sa Kamara hinggil sa 2019 proposed national budget na nagkakahalaga ng P3.757 trilyon noong Lunes matapos ilang mambabatas ang nagbunyag na may P55 bilyong halaga ang isiningit sa proposed budget na wala sa National Expenditure Program o NEP.
- Latest
