Pagbuwag sa NFA igigiit ng Senado

MANILA, Philippines — Ibinunyag ni Sen. Cynthia Villar na kasali sa kanilang pinag-iisipan sa Senado ang pagbuwag sa National Food Authority (NFA).

Ito’y dahil hindi naman nagagawa ng NFA ang kanilang mandato na magkaroon ng buffer stock ng bigas para matulungan ang mga magsasaka at mga kumokonsumo ng bigas.

Kapag naipasa na raw ang Rice Tarrification Bill, mali-liberalize umano nito ang importation ng bigas at malaki ang maitutulong nito sa mga local farmers sa bansa.

Wika pa ni Sen. Villar, kapag nagawa nila ito ay posibleng buwagin na ang opisina ng NFA.

Idinagdag pa ng senadora na hindi raw nagagawa ng Philippine Competition Commission na tutukan at gumawa ng paraan para mapigilan ang rice cartel na isa sa nagiging dahilan sa pagtaas ng presyo ng bigas sa merkado.

Kung tutuusin wala raw dahilan para tumaas ng higit P40 ang presyo ng bigas, lokal man o imported dahil ang puhunan nito ay nasa P25 hanggang P36.

Dapat kumilos na ang gobyerno para magkaroon ng price control sa bigas para hindi naabuso ang presyo nito, giit pa ni Villar.