P15-M babayaran ng Xiamen
‘Di pa kasama ang equipment, manpower costs
MANILA, Philippines — Posibleng magbayad sa gobyerno ng nasa P15 milyon ang Xiamen Airlines matapos ang ilang araw na pagsasara sa main runway ng Ninoy Aquino International Airport (NAIA) bunsod ng pagsadsad ng isa nitong eroplano kamakailan.
Sinabi ni Manila International Airport Authority (MIAA) General Manager Ed Monreal, maari pa raw na mas tumaas pa ito sa oras na matapos ang komputasyon para sa equipment at manpower costs na ginastos sa pag-angat sa sumadsad na eroplano kung saan apektado ang mga international at domestic flights ng NAIA.
Sa crane lang anya na ginamit sa pag-angat sa Boeing 737 jet ay nasa P4 milyon na ang halaga.
Magugunita na humingi na ng paumanhin ang Xiamen Air sa MIAA at sa mga pasaherong apektado ng nangyaring delay dahil sa nangyaring pagkakasadsad ng eroplano sa NAIA Terminal 1 runway bunsod naman ng masamang lagay ng panahon.
Namahagi rin ng mga pagkain at tubig sa mga pasahero na stranded sa airport ang naturang airline, hakbang na ginawa rin ng iba pang airlines na nagkansela, na-delay o nag-reroute ng kani-kanilang mga flights dahil sa nasabing insidente.
Ayon kay Monreal, maari raw na maghain ng hiwalay na kaso ang iba pang airline companies laban sa Xiamen Air para mabawi ang kanilang ikinalugi mula sa 36-oras na delay.
Samantala, balik normal na kahapon ang operation ng Philippine Airlines (PAL).
Ayon kay PAL spokesperson Cielo Villaluna, wala na umanong kanselado at stranded na pasahero sa paliparan kayat umaasa silang magiging normal na rin ang sitwasyon.
Ayon naman kay Cebu Pacific spokesperson Charo Logarta, wala na rin daw silang mga flight na kinansela ngayong araw matapos ang recovery flight sa mga apektadong pasahero.
- Latest
