Joy B tumanggap ng ayuda mula kay Inday Sara para sa mga binaha
MANILA, Philippines — Nagkaloob si Davao City Mayor Sara Duterte-Carpio ng P500,000 halaga kay Quezon City Vice Mayor Joy Belmonte nang ilunsad ang alyansa ng Hugpong ng Pagbabago (HNP) kasama ang iba’t-ibang mga lokal at rehiyonal na partido, kabilang na ang Serbisyo ng Bayan Party (SBP) ng Quezon City na pinangunahan ng huli.
Ang naturang ayuda ay laan para sa mga nabiktima ng nagdaang mga kalamidad sa bansa na higit na naapektuhan ang mga taga-QC .
Nagbigay rin ng P500,000 si Duterte kay Pampanga Governor Lilia Pineda bilang tulong sa kanyang mga nasasakupan na apektado ng baha.
Pinasalamatan naman ni Duterte-Carpio sa kanyang talumpati sina Belmonte at Pineda sa pagpunta nila sa paglulunsad ng nasabing alyansa sa kabila ng kanilang mga isinasagawang “relief operations” para sa kanilang mga nasasakupan.
Noong July 23 ay nagsanib-pwersa sina Duterte-Carpio at Belmonte para sa muling pagpirma ng kasunduan sa sister-city ties ng lungsod ng Davao at Quezon. Pinangunahan din nila ang paglunsad ng “Tapang at Malasakit” sa QC.
- Latest