Visa forfeiture vs Sister Fox iligal - DoJ

MANILA, Philippines — Pinababaliktad ng Department of Justice sa Bureau of Immigration ang desisyon sa forfeiture ng missionary visa ni Sister Patricia Fox.

Sa statement na inilabas ni Justice Sec. Menardo Guevarra sinabi nito na wala umanong legal basis ang visa forfeiture proceedings laban sa Australyanang madre.

Paliwanag ni Guevarra, sa umiiral kasi umanong immigration laws at BI rules ay visa cancellation procesure ang dapat ginamit ng Immigration at hindi forfeiture.

Dahil dito, inatasan ng DoJ ang BI na gamitin ang tamang procedure at ayusin ang kaso laban kay Sister Pat.

Inatasan din ng DoJ ang BI na dinggin ang visa cancellation ni Sister Pat gayundin ang deportation case laban dito.

Pero maaari pa rin naman umanong manatili sa bansa si Fox habang inaayos ang kaso.

Maalalang noong nakaraang buwan, sinabi ni Guevarra na kailangang tumalima ni Sister Pat sa direktiba ng Bureau of Immigration (BI) na kailangan niyang umalis sa bansa sa loob ng 30 araw.

Ang naturang utos ng BI ay nagtapos na kahapon, Hunyo 18.

Pero iginiit naman ni Atty. Maria Sol Taule, abogado ni Fox na hindi pa puwedeng paalisin sa bansa ang Australianong madre dahil may pending pa itong apela sa DoJ.

At sakali umanong ibasura ng DoJ ang kanilang apela ay magpapasaklolo pa ang mga ito sa Office of the President o sa Supreme Court (SC).

Related video: