Bong Go, hinamon si Trillanes ng ‘saksakan ng ballpen’
MANILA, Philippines — Binuweltahan ni Special Assistant to the President Bong Go si Sen. Antonio Trillanes IV dahil sa hindi raw pagseryoso nito sa kanyang “one-on-one” challenge.
Hinamon pa nga nito ang senador na magsaksakan sila ng ballpen.
Magugunita na noong Huwebes sinabi ni Go na handa siya sakaling gustuhin man daw ni Trillanes na mag-one-on-one silang dalawa.
Ito ay matapos naman siyang batikusin muli ng senador dahil sa pagiging hindi raw niya totoo sa kanyang political plans.
Sinagot naman ito ni Trillanes at sinabi pa na handa raw siyang makipag one-on-one kay Go at kay Pangulong Duterte sa pamamagitan nang paglalagda raw ng bank secrecy waivers upang sa gayon masilip daw ang mga yaman ng mga ito.
Nauna nang dinipensahan ni Pangulong Duterte si Go hinggil sa mga alegasyon ng umano’y pagkakasangkot niya sa Navy Frigate deal.
Iginiit ng punong ehekutibo na bilyonaryo si Go.
Pero para kay Go, biro lamang daw ang pahayag ni Pangulong Duterte na bilyonaryo siya.
“Nang pabirong sinabi ng Pangulo na bilyonaryo ako, merong ari-arian ang pamilya namin kung sakaling ibenta ito. ‘Yun ang ibig pong sabihin ng Pangulo,” ani Go.
“‘Di ko na kailangang magnakaw ng pera ng gobyerno at pera ng tao tulad ni Mr. Trillanes at tinatago agad sa ibang bansa,” dagdag pa nito.
- Latest