Excise tax sa langis inirekomendang suspendihin
MANILA, Philippines — Inirekomenda na kahapon ng Senate committee on public services na pinamumunuan ni Senator Grace Poe na suspendihin ang excise tax sa langis na bahagi ng tax reform package.
Ginawa ng komite ang rekomendasyon matapos ang public hearing sa Iloilo kahapon tungkol sa epekto ng Republic Act No. 10963 o ang Tax Reform for Acceleration and Inclusion (TRAIN) law partikular sa mga bilihin at transportasyon.
Ipinunto ni Poe ang walang humpay na pagtaas ng presyo ng mga produktong petrolyo kaya dapat ng pag-aralan ng Department of Finance ang suspensiyon.
Sa ginanap na pagdinig, lumabas na ang pump prices sa Panay region ay tumaas na ng nasa 30 porsiyento o P10.00 sa diesel at gasolina simula noong Disyembre ng nakaraang taon.
Idinagdag ni Poe na hihilingin niya ang tulong ng mga kasamahang senador na suportahan ang panawagan sa suspensiyon ng excise tax sa langis.
- Latest