Pekeng Dengvaxia cards kumakalat
MANILA, Philippines — Nagbabala sa publiko si House Appropriations Committee Chairman Karlo Nograles tungkol sa pagkalat ng pekeng Dengvaxia cards na tulong sana para sa mga lehitimong nabakunahan ng Dengvaxia.
Ang Dengvaxia cards ay ipinamahagi ng DOH noong Enero sa mga estudyante na naturukan ng Dengvaxia at ginagamit para sa pag-monitor ng kalusugan ng mga nabakunahan.
Magagamit din ito at para sa pagpapa-ospital at sa gamutan ng Dengvaxia patient.
Subalit nababahala si Nograles dahil napepeke na ito ngayon at maaari itong magpalala sa sitwasyon ng mga tunay na vaccinees.
Dahil dito, pinakikilos ng kongresista si Health Sec. Francisco Duque III na maglagay ng safeguards sa verification ng Dengvaxia cards at pinatutukoy ang mga pekeng Dengvaxia cards.
Pinagagawa rin ang DOH ng database para ma-verify kung talagang totoong vaccinees ang humihingi ng tulong sa gobyerno.
- Latest