Total deployment ban sa Kuwait inalis na
MANILA, Philippines — Iniutos na ni Pangulong Duterte ang total lifting ng deployment ban ng Pinoy overseas workers sa Kuwait.
“Upon recommendation of Special Envoy to Kuwait Abdullah Mama-o, President Rodrigo Roa Duterte instructed Secretary Silvestre Bello to totally lift the ban on deployment of Filipino workers to Kuwait,” ayon kay Presidential Spokesman Harry Roque.
Agad na ring nilagdaan ni Labor Sec. Silvestre Bello III ang department order sa total lifting ng deployment ban ng OFWs sa Kuwait.
Gayundin ang agarang implementasyon nito sa 20,000 OFWs na agad makikinabang sa total lifting ng deployment ban lalo na ang mga household workers.
Nauna nang bumuhos ang mga skilled workers sa tanggapan ng Philippine Overseas Employment Administration (POEA) nitong Miyerkules nang unang ianunsyo ng Palasyo ang partial lifting para sa mga skilled at semi-skilled workers kasunod ng paglagda ng dalawang bansa sa memorandum of agreement kamakailan.
Magugunita na idineklarang persona-non-grata ng Kuwaiti government si Ambassador Renato Villa dahil sa kontrobersyal na rescue mission sa mga distressed OFW sa gulf state.
Noong Pebrero ay inutos ng Pangulo ang total ban ng deployment ng OFW sa Kuwait kasunod ng pagkakadiskubre sa pinaslang na OFW na si Joanna Demafelis na inilagay ng kanyang amo sa freezer.
- Latest
