Digong sinadya ang hindi pagboto

MANILA, Philippines — Sinadya ni Pangulong Duterte na hindi bumoto sa nakaraang barangay elections.

Sinabi ng Pangulo sa media interview sa pagdalaw niya sa burol ni dating Senate President Edgardo Angara, kakilala niya pareho ang tumatakbong chairman kaya mas pinili niyang huwag ng bumoto upang walang magtampo sa mga ito kung sino ang kanyang binoto.

Magugunita na hanggang sa nagsara ang presinto sa Daniel Aguinaldo High School sa Davao City kamakalawa ay hindi nakaboto ang Pangulo.

Nagpaabot ng pagbati si Pangulong Duterte sa mga nanalo sa ginanap na barangay at Sangguniang Kabataan elections.

Sinabi ni Presidential Spokesman Harry Roque kahapon, naging payapa sa pangkalahatan ang halalan sa buong bansa. Ang pagdaraos ng eleksyon ay katunayan lamang na buhay na buhay ang demokrasya sa bansa.