Report sa Dengvaxia inihain na sa Senado

MANILA, Philippines — Inihain na sa Senado ang report ng Senate Blue Ribbon Committee kaugnay ng P3.4 bilyong halaga ng anti-dengue vaccine na Dengvaxia.

Ipinagmalaki ni Sen. Richard Gordon, chairman ng komite, na mayorya ng mga miyembro ang lumagda sa inilabas na Committee Report No. 368.

Ayon kay Gordon, natutuwa siya na magpagde-debatihan sa plenaryo ang inilabas na report kung saan kabilang sa mga rekomendasyon ang pagsasampa ng kaso laban kay dating Pangulong Noynoy Aquino.

“More than majority signed the recommendations and we can debate it. I am happy na pag-uusapan sa floor kasi diyan naman talaga dapat mag-debate, hindi naman sa labas. We should debate within the chamber and within the rules,” sabi ni Gordon.

Tiniyak din ni Gordon na walang halong pulitika sa imbestigasyon o sa report na isinumite ng Blue Ribbon.

“Ang aim ng investigation has always been the protection of the children. Kaya tayo nag-imbestiga to protect the children and to insulate the DOH (Department of Health) from politics na nakakasama sa kalusugan ng ating bayan. What we are doing here is not political,” sabi ni Gordon.

Nilinaw ni Gordon na hindi niya layunin na magdiin ng tao pero may pananagutan umano ang mga opisyal na nasa likod ng programa.

Kabilang din sa rekomendasyon ng komite ang paglalaan ng sapat na pondo para sa monitoring ng mga naturukan ng vaccine kahit hindi pa nagkakaroon ng dengue.

Bukod kay Aquino, nais din ng komite na kasuhan sina dating Health secretary Janette Garin, dating Budget secretary Florencio Abad, Philippine Children Medical Center director Julius Lecciones at iba pang opisyal ng DoH at Food and Drug Administration.