$185.7-M investment nakuha ni Duterte

MANILA, Philippines — Ipinagmalaki kahapon ng Malacañang na nakakuha si Pangulong Rodrigo Duterte ng may $185.7 milyong investment mula sa kanyang opisyal na pagbisita sa Singapore matapos na dumalo sa Association of Southeast Asian Nations (ASEAN) Summit.

Sinaksihan ni Du­terte ang paglagda sa  US$185.7 milyong halaga ng investment agreements sa iba’t bang Singaporean companies matapos siyang dumalo sa ASEAN Summit.

Inaasahang lilikha ng nasa 1,920 trabaho para sa mga Pilipino ang mga bagong investments.

Sa kanyang talum­pati, tiniyak ng Pangulo sa mga Singaporean businessmen na walang korapsyon sa kanyang  administrasyon.

“For as long as I am there, there will be no corruption in my government,” pahayag ni Duterte sa signing ng mga business agreements na ginawa sa Ritz Carlton Millenia Singapore.

Sinabihan din ng Pa­ngulo ang mga Singaporean businessmen na hindi dapat bumigay sa mga nangungurakot sa gobyerno.

“Do not give in to them. All you have to do is to make a call I said and I will grant you anytime especially about graft, about workers in government asking for money,” pahayag ni Duterte.

Tiniyak din ng Pangulo na aatasan niya ang Departments of Trade at Finance  na bumuo ng panuntunan upang mas maging simple at madali ang pagnenegosyo sa bansa.

Ayon pa sa Pangulo protektado ang mga negosyo sa Pilipinas basta’t ang mga investors ay nagbabayad ng tamang buwis at sumusunod sa batas.

“You just take care of the laws. There are set of laws to follow. If it’s followed, then we are okay and we can talk about business,” pahayag ng Pangulo.

Itataya umano ng Pa­ngulo ang kanyang presidency sa paglaban niya sa katiwalian.

“I welcome you. I assure you the protection that you need. No corruption is no corruption. I stake my presidency on this. I will lose the presidency on this. I will lose the honor and the prestige in pursuing that policy of no corruption,” pahayag ni Duterte.

Nagpahayag din ang Pangulo ng kahandaan na makialam kung magkakaroon ng problema ang mga investors sa mga local government units.

“My powers are limi­ted. But I can change the rules down there if I really want to especially if it involves wrongdoing,” sabi ng Pangulo.

Iba’t ibang Singaporean companies ang nagsumite ng memorandums of understanding (MOUs) at letters of intent (LOIs) sa larangan ng urban development, renewable energy, aviation, manufacturing, economic at trade cooperation.