Impeachment vs Sereno aprub na sa komite

Sa botong 33-1

MANILA, Philippines — Inaprubahan na ng House Committee on Justice ang impeachment complaint laban kay Supreme Court (SC) Chief Justice Maria Lourdes Sereno.

Sa botong 33 na “yes” at isang “no” ay naaprubahan ang  45-pahinang committee report at 56 pahina na “articles of impeachment” ni Sereno.

Tanging si Quezon City Rep. Kit Belmonte ang tumutol sa nasabing botohan at iginiit na sa plenaryo na siya magsusumite ng kanyang “written explanation” sa naging boto.

Sa 27 alegasyon na ini­hain ni Atty. Larry Gadon laban kay Sereno, 24 dito ang isinama sa inaprubahang committee report kabilang dito ang grounds na culpable violations of the constitutions, graft and corruptions at iba pang high crimes, gayundin ang resulta ng “psychiatric evaluations”ng Punong Mahistrado.

Nilinaw naman ni Com­mittee chairman Rep. Reynaldo Umali na bagama’t hindi kasama ang resulta ng psychiatric test ng Punong Mahistrado ay nagbigay ito ng indikasyon kaya nagkaroon ng pattern ang ganung ugali ni Sereno a SC.

Kaagad namang isusumite sa rules committee ang articles of impeachment at may 10 araw ito para iakyat sa plenaryo, subalit dahil sa hanggang Miyerkules na lang ang sesyon ng Kongreso para sa kanilang Lenten break ay malamang sa Mayo na  matalakay sa plenaryo ang impeachment complaint sa pagbabalik ng sesyon.

Matapos nito, agad iaakyat sa Senado ang articles of impeachment na magsisilbing impeachment court.

Nilinaw naman ni Umali na kung madedesisyunan na agad ang “quo warranto petition” sa SC at mapaalis nito si Sereno  ay magiging “moot” na ang lahat ng nangyaring proseso sa Kamara. Aniya, malakas at kumpleto ang kanilang mga ebidensya at dokumento laban kay Sereno.

Ayon naman kay Uma­li hindi pa nakabubuo ng panel ang Kamara na tatayong prosecution team dahil magbobotohan pa sila bagama’t tradisyunal na magiging lead prosecutor ang chair ng komite at co-lead prosecutor si Majority leader Rudy Fariñas, Speaker Pantaleon Alvarez, at si dating Senador Juan Ponce Enrile bilang adviser gayundin ang dating defense team ni dating Chief Justice Corona na sina Attys. Jess Manalo at Tranquil Salvador. 

Samantala, sinabi ng Malacañang na ipauubaya na nila sa liderato ng Kamara ang desisyon matapos aprubahan ng House committee on justice ang articles of impeachment laban kay Sereno, ayon kay Presidential Spokesman Harry Roque.

“We leave matter of CJ’s impeachment to Congress,” wika ni Roque. (Gemma Garcia/Butch Quejada/Rudy Andal)