‘Kamay ni Duterte hindi naman namamaga’ – Roque
MANILA, Philippines — Itinanggi ni Presidential Spokesperson Harry Roque na namamaga ang kamay ni Pangulong Rodrigo Duterte matapos mapaulat ang sinabi ni Philippine National Police (PNP) chief Director General Ronald “Bato” Dela Rosa na napasuntok ito sa pader sa Malacañang dahil sa galit.
Sa isang panayam sa radyo, sinabi ni Roque na hindi niya tiyak kung totoong napasuntok ang Pangulo sa pader ng Malakanyang dahil sa desisyon ng Department of Justice na iabsuwelto sina Rolando “Kerwin” Espinosa Jr., at Peter Lim mula sa mga kinakaharap na kaso tungkol sa ilegal na droga.
Sinabi ni Roque na kasama niya ang Pangulo halos maghapon noong Biyernes at wala naman siyang napansing kakaiba sa kamay nito.
“Hanggang alas kuwatro po kaninang umaga magkasama kami ni Presidente. Wala pong diperensiya ang kaniyang kamay... Hindi ko po alam kung talagang totoong nanuntok sa dingding ‘yan. Kasi ang nangyari po, pagkatapos po ng Command Conference, hindi na po kami naghiwalay,” sabi ni Roque.
Bukod kay Roque kasama rin umano ng Pangulo si Special Assistant to the President Bong Go.
Nauna rito, sinabi ni Roque na labis na nadismaya ang Pangulo sa nangyari sa kaso nina Espinosa at Lim.
Pero naniniwala rin si Roque na buo pa rin ang tiwala ng Pangulo kay DOJ Secretary Vitaliano Aguirre kaya nanatili pa rin ito sa puwesto.
- Latest