Philippine Marine Corp. gagawing isa sa sangay ng AFP
MANILA, Philippines — Isinusulong ni House Speaker Pantaleon Alvarez ang panukala para sa pagdeklara ng Philippine Marine Corp. bilang isa sa sangay ng Armed Forces of the Philippines (AFP).
Sa kasalukuyan, ang Philippine Marines ay nasa ilalim ng Philippine Navy.
Subalit sa ilalim ng House Bill 7304 na inihain nina Alvarez at House Majority leader Rodolfo Farinas, magiging distinct at autonomous na ito bilang hiwalay na sangay tulad ng Philipine Air Force, Philipine Navy at Philippine Army.
Sinabi nina Alvarez at Fariñas na ang kawalan ng sariling charter ng Philippine Marines ay ugat ng ilang problema sa institusyon nito tulad ng sa usapan ng pondo at organisasyon.
Sa sandaling maisabatas ang panukala, ang Marines ay magkakaroon ng malinaw na otorisasyon para sumuporta sa law enforcement agencies at tumugon sa oras ng kalamidad at trahedya.
Isinasaad naman sa panukala na pamumunuan ito ng commandant na may ranggong Lieutenant General na itatalaga ng pangulo ng bansa.
Itatatag naman ang tatlong base ng Philipine Marines sa Luzon, Visayas at Mindanao.
- Latest