Senado ‘di kayang impluwensyahan ni JPE - Ping
MANILA, Philippines — Tiniyak kahapon ni Senator Panfilo “Ping” Lacson na hindi maiimpluwensiyahan ni dating Senate President Juan Ponce Enrile ang mga dating kasamahang senador sakaling matuloy ang pag-upo nito bilang private prosecutor sa impeachment trial ni Supreme Court Chief Justice Maria Lourdes Sereno.
Ayon kay Lacson, maaring maging isyu ang “propriety” sa pag-upo ni Enrile sa panig ng prosecution team dahil dati siyang miyembro ng Senado.
“Maybe the issue being raised here is the propriety being a former SP with many former colleagues in the Senate, he could influence,” sabi ni Lacson.
Pero nakatitiyak si Lacson na hindi maaaring impluwensiyahan ang Senado na magiging impeachment court kahit ni Enrile.
Si Enrile na 94 taong gulang na ay ang dating presiding officer sa impeachment trial ni dating Supreme Court Chief Justice Renato Corona.
Sinabi ni Lacson na walang kuwestiyon sa kuwalipikasyon at kakayahan ni Enrile dahil sa naging karanasan na rin nito.
Samantala, sinabi ni Senator Francis “Chiz” Escudero na malaking dagdag ang malawak na karanasan ni Enrile kahit pa saang panig ito mapunta.
- Latest