Whistle blower sa MRT anomaly hawak ng Malacañang
Hatian sa pondoibinunyag
MANILA, Philippines — Hawak na ng gobyerno ang isang whistle blower hinggil sa umano’y maanomalyang pagpili ng Aquino administration ng maintenance provider nito na naging sanhi ng aberya ng MRT 3.
Sinabi ni Presidential Spokesman Harry Roque kahapon, batid ng hawak nilang whistle blower kung paano ang ginawang hatian ng mga opisyal hinggil sa pondo para sa MRT maintenance.
Ayon kay Roque, nabunyag din na mayroong Pangasinan Group sa isyu ng MRT 3 kung saan 33 percent ng ibinabayad ng pamahalaan para sa kontrata ng maintenance nito ay ibinubulsa umano ng naturang grupo.
Ang panibagong 33% naman ay napupunta sa tinatawag nilang political machinery kaya mahigit 30 porsyento lamang ng budget ang napupunta para sa maintenance ng MRT 3.
“Meron pala kasing tinatawag na Pangasinan Group diyan. Tapos maniwala kayo at hindi ang sabi ng whistleblower ay 1/3 daw nung total na binabayad natin para sa kontratang ito ay napupunta lang doon sa Pangasinan group ‘no. Tapos 1/3 daw diumano ay binabayad din sa political machinery at 1/3 lang talaga iyong napupunta para sa pag-maintain ng MRT 3. Talaga namang kapag 1/3 lang sa binabayad ang ginugugol para sa MRT 3, talagang masisira iyan at magkalintik-lintik gaya ng nangyayari ngayon,” paliwanag ni Roque.
Dagdag pa ng presidential spokesman, isa-isa nang naglalabasan ngayon ang mga whistle blower sa MRT 3 mess at kinukumpleto na lamang nila ang mga documentary evidence upang patunayan kung paano pinaghatian ang budget na para sa MRT 3 maintenance kaya nagkaproblema ngayon ang operasyon ng nasabing mass transport system.
“Itinalaga po talaga si Solicitor General, paspasan ang pagpa-file pa ng lahat ng kaso na kinakailangan at kasi in fairness, ngayon lang lumalabas iyong mga whistleblower. Ngayon lang may hawak tayong whistleblower kung paano ang hatian,” giit pa ni Roque.
- Latest