Kumpanya sa Japan nag-alok ng paid leave para sa mga non-smokers na empleyado

MANILA, Philippines - Isang kumpanya sa Japan ang nakaisip ng kakaibang paraan upang mapatigil ang kanilang mga empleyado sa paninigarilyo.

Ayon sa ulat ng The Telegaraph, may dagdag na anim na araw na bakasyon bawat taon ang maaring magamit ng mga empleyadong hindi gumagamit ng “yosi break” ng Piala Inc. sa Tokyo.

Ito ay matapos aprubahan ng CEO ang mungkahi ng isang empleyado na nagiging problema umano sa loob ng kumpanya ang paggamit ng “yosi break” ng mga empleyado na kadalasang tumatagal ng 15 minuto.

Hindi bababa sa 30 empleyado ng Piala ang agad na nakapagbakasyon matapos aprubahan ng kumpanya ang direktiba nitong Setyembre.

Samantala, sa isang pag-aaral ng World Health Organization, 21.7 percent ng mga Hapon ay naninigarilyo.

Dahil dito ay patuloy na gumagawa ng paraan ang mga kumpanya sa Japan upang maprotektahan ang kanilang mga empleyado sa epekto ng second-hand smoke.