Digong gustong ibaba ang edad ng papatawan ng kasong kriminal
MANILA, Philippines - Nais pa rin ni Pangulong Duterte na amyendahan ang batas upang maibaba ang edad ng mga maaring sampahan ng kasong kriminal.
Ito ay sa kabila ng resulta ng survey na nagsasabing pabor ang mga mamamayan na manatili sa 15 taon ang minimum age na maaring magkaroon ng criminal liability.
Sabi ni Presidential Spokesman Ernesto Abella, na kasama pa rin sa legislative agenda ng Pangulo na baguhin ang edad ng mga makakasuhan upang maging responsable ang mga kabataan sa kasalanang kanilang nagawa.
Kung mababago ang batas, magsisilbing proteksiyon din aniya ito sa mga kabataan upang hindi na magamit ng mga sindikato sa paggawa ng krimen.
Posible aniyang hindi nauunawaan ng mga sumagot sa survey ang layunin ng Pangulo na maamiyendahan ang kasalukuyang batas.
Lumabas sa isinagawang survey na 55 porsiyento ng mga respondents ay nais pa ring ipako sa 15 taon ang minimum age ng mga maaring sampahan ng kaso.
Naniniwala rin si Abella na dapat ipaliwanag lamang sa mga mamamayan ang dahilan kung bakit kinakailangang ibaba ang minimum age para sa criminal liability.
“The survey shows is that there is still a lot of work to be done, especially in explaining to Filipinos, on the rationale behind lowering the minimum age of criminal liability,” ani Abella.
- Latest