Malacañang dismayado sa UN rapporteur

MANILA, Philippines -  Dismayado ang Malacañang kay UN Special Rapporteur Agnes Callamard dahil sa pagpunta dito sa Pilipinas na wala man lang abiso at pakikipag-ugnayan sa gobyerno.

Ayon kay Presidential Spokesman Ernesto Abella, malinaw na hindi interesado si Callamard na makuha ang katotohanan sa kanyang pakay.

Sinabi ni Abella, inimbitahan ng Malacañang si Callamard noong Sept. 26, 2016 na bumisita sa Pilipinas para makilala nito ang nasa gobyerno at makakuha siya ng tunay na kalagayan ng inilunsad na drug war ni Pangulong Duterte pero hindi tinanggap ni Callamard.

“Our hope at that time was that Dr. Callamard would accept this invitation as part of a commitment to carry out her new responsibilities in a manner that was objective and fair to all perspectives on this important issue. The fact that Dr. Callamard did not respond to our invitation showed that she would not be approaching her review of allegations concerning our country objectively or comprehensively,” wika ni Abella.

Lalo pa umanong tumibay ang kanilang paniwalang hindi interesado sa patas at komprehensibong assessment si Callamard ang timing ng pagbisita nito sa bansa ngayon kung kailan bumiyahe papuntang Geneva ang senior-level delegation ng Pilipinas para makipagkita sa mga opisyal ng Office of the United Nations High Commission for Human Rights bilang bahagi ng 3rd Cycle Universal Period Review sa human rights issue.

Nilinaw naman ng panig ni Callamard na hindi siya pumunta sa Pilipinas para sa imbestigasyon ukol sa extra judicial killings (EJK).

Ayon sa kampo ni Callamard, hindi nila ito maaaring maisakatuparan kung walang pahintulot na ibinibigay ang gobyerno ng Pilipinas.

Kritiko ni Pangulong Duterte si Callamard sa sinasabi nitong EJK kaugnay sa drug war ng gobyerno at naririto ito sa bansa para sa isang unofficial visit kung saan ay dumalo sa isang forum.