Real estate broker itinumba
MANILA, Philippines – Pinagbabaril at napatay ng hindi pa nakilalang mga armadong salarin ang isang real estate broker habang lulan ng behikulo sa naganap na ambush sa KM 3 Brgy. Pico, La Trinidad, Benguet, kamakalawa ng gabi.
Idineklarang dead-on-arrival sa Pines City Doctors Hospital ang biktimang nakilalang si Roberto Obidos, 52, tubong Samar, Leyte sanhi ng mga tinamong tama ng bala partikular na sa leeg at iba pang bahagi ng katawan.
Sa ulat ng Cordillera Police, naitala ang krimen sa nasabing lugar bandang alas-8:25 ng gabi.
Ayon sa imbestigasyon, kasalukuyang lulan ng kaniyang kulay pulang Innova (ARA-5003) ang biktima ng pagbabarilin ng mga armadong salarin habang patungo sana ito sa Balili LTB ( Land Transportation Benguet ) upang kunin ang kaniyang lisensya.
Ang mga suspek ay mabilis na tumakas matapos masigurong napuruhan ng mga tama ng bala ang target patungo sa hindi pa malamang destinasyon.
Sa pahayag ni Gng. Imelda Obidos, 50, misis ng biktima, Regional Health Officer sa La Trinidad, Benguet huli niyang nakitang buhay ang mister dakong alas-7:40 ng umaga kamakalawa matapos siyang ihatid nito sa trabaho.
Kasalukuyan nang nirerebyu ng pulisya ang CCTV footage upang matukoy at matunton ang mga salarin. Isinasailalim pa sa masusing imbestigasyon ng pulisya ang motibo ng krimen.
- Latest