Bangsamoro transition body aprub ni Duterte

MANILA, Philippines - Nilagdaan na kahapon ni Pangulong Rodrigo Duterte ang isang executive order na nagtatatag sa isang bagong Bangsamoro Transition Commission na papalit sa orihinal na 15-miyembrong panel na nagbabalangkas sa ligal na pundasyon ng magiging pamahalaang Bangsamoro sa Mindanao.

Mula sa bilang na 15, magiging 21 ang miyembro ng BTC.

Sa ilalim ng EO, ang 11 miyembro ng BTC ay magmumula sa Moro Islamic Liberation Front habang ang 10 pa ay inonomina ng pamahalaan.

Sinabi ni Presidential Adviser on the Peace Process Secretary Jesus Dureza hihingin ng BTC ang mga opinyon ng lahat ng sektor para sa panukalang Bangsamoro bill.

Sa pamamagitan ng EO, inutos ni Duterte na pagsamahin sa isang enabling law ang mga probisyon ng 1996 agreement sa Moro National Liberation Front at ang 2014 Comprehensive Agreement on Bangsamoro sa MILF.

Sinabi ng tagapangulo ng government implementing panel na inaasahang maisusumite ng BTC sa Kongreso sa kalagitnaan ng 2017 ang burador ng batas.