AFP may free viewing sa Pacman-Vargas bout
MANILA, Philippines - Magkakaloob ng ‘free viewing’ ang Armed Forces of the Philippines (AFP) sa nalalapit na laban ni pambansang kamao Manny “Pacman” Pacquiao kay Mexican boxer Jessie Vargas sa Thomas and Mack Center sa Sabado ng gabi sa Las Vegas, Nevada, USA, Linggo ng umaga naman (Nobyembre 6) sa Manila.
Ayon kay AFP Spokesman Brig. Gen. Restituto Padilla, kabilang sa lugar na pagdarausan ng live screening sa Pacman vs Vargas ay sa AFP Wellness Center sa Camp Aguinaldo, Quezon City; AFP Medical Center sa V. Luna at mga pangunahing base ng Philippine Army, Philippine Navy at Philippine Air Force.
“Sa ating kasundaluhan lalo na po dito sa ating AFP Medical Center kung saan ang ating mga wounded warriors ay nag-aantay upang mapanood na naman ang kanilang peoples champ na si Manny Pacquiao sa kanyang susunod na laban kay Vargas, handa na po tayo,” ayon kay Padilla.
Ayon kay Padilla, napili nila ang AFP Medical Center para pagdausan ng live screening upang palakasin pa ang moral ng mga magigiting na sundalong sugatan sa combat operation na naka-confine sa nasabing pagamutan.
Samantala tulad ni Pangulong Rodrigo Duterte, ang fearless forecast naman ng AFP ay mana-knockout ni Pacman si Vargas.
Si Pacman ay isang reservist ng Philippine Army na may ranggong Lt. Colonel, na isa ring Executive Officer ng 1st Sarangani Infantry Battalion (Ready Reserve Force).
Pumasok si Pacman sa Army Reserve Force noong Abril 2006 bilang Sarhento at mula rito habang patuloy ang panalo nito sa boxing ay tumaas ng tumaas ang ranggo.
Na-promote naman si Pacman sa ranggong Lt. Colonel noong 2011 matapos itong muling mag-uwi ng panalo.
- Latest
