Pinoy fishermen, pinayagan nang mangisda sa Scarborough
MANILA, Philippines – Nagsimula nang makapangisda nang malaya ang mga Pinoy sa pinag-aagawang Scarborough o Panatag Shoal sa West Philippine Sea (South China Sea).
Base sa report, pinayagan nang maglayag at makapangisda ang mga Filipino fishermen sa Scarborough Shoal nang hindi itinataboy ng mga Chinese troops na patuloy na nagpapatrolya sa pinag-aagawang shoal.
Labis na ikinatuwa ng mga mangingisda nang makakuha sila ng maraming isda sa shoal nang hindi pinipigilan o ginigipit ng tropa ng mga Tsino.
Dahil dito, ikinatuwa ng Armed Forces of the Philippines (AFP) ang kaganapan sa shoal kasunod na rin ng pakikipag-usap ni Pangulong Rodrigo Duterte kay Chinese President Xi Jinping at ibang lider matapos ang kanyang state visit sa China nitong Oktubre 18-21.
Matapos ang pagbisita, sinabi ni Duterte na ilang araw na lamang ay inaasahan nang makakapangisda na ang mga Pinoy sa Panatag shoal.
“We wait a few more days at baka makabalik na tayo sa Scarborough Shoal, ang pangingisda ng ating mga kababayan,” unang pahayag ng Pangulo matapos ang pagbisita nito sa mga biktima ng bagyong Lawin sa Tuguegarao, Cagayan.
Sinabi ni Defense Secretary Delfin Lorenzana na “most welcome” ang hakbang ng China na payagan nang makapangisda ang mga Pinoy sa shoal, may 228 kilometro sa hilagang bahagi ng Pilipinas, na siyang pangunahing pinagkukunan ng kanilang pangkabuhayan.
Nilinaw naman ni Lorenzana na nananatili pa sa shoal ang Chinese Coast Guard subalit hindi na nila hina-harass ang mga mangingisdang Pinoy. Ito ay kasunod sa ulat na umalis na ang tropa ng mga Tsino sa Scarborough Shoal.
Nabatid na wala pang malinaw kung hanggang kailan pahihintulutan ng China na makapangisda ang mga Pinoy sa kanilang sariling teritoryo sa WPS sa kabila ng ipinalabas na ruling ng United Nations arbitral tribunal nitong Hulyo na pumapabor sa Pilipinas laban sa China na mananatiling malaya ang mga mangingisda sa tinaguriang “common fishing ground” sa South China Sea o WPS.
Samantala, bukas naman sa US sa katauhan ni Deputy Secretary of State Antony Blinken ang ulat na “withdrawal” ng Chinese troops sa Scarborough Shoal.
- Latest
