China umaasa sa mas magandang relasyon sa Pinas sa pag-upo ni Duterte

MANILA, Philippines — Binati ng China si presumptive President Rodrigo “Rody” Duterte sa kaniyang pagkapanalo sa katatapos lamang na eleksyon at kasabay nito ang kanilang panawagan para sa mas magandang relasyon ng dalawang bansa.

"The Chinese side has noted the successful presidential election in the Philippines. We congratulate Mr. Duterte on winning the vote," pahayag ni Chinese Foreign Ministry spokesperson Hong Lei kahapon.

"The Chinese side attaches importance to developing relations with the Philippines, and stands ready to work alongside the new Philippine government to properly deal with relevant disputes through friendly dialogue and bring bilateral ties back to the track of sound development," dagdag niya.

Nakabinbin sa Permanent Court of Arbitration sa ilalim ng United Nations (UN) ang arbitration case na inihai ng Pilipinas kontra China kaugnay ng pinag-aagawang teritoryo sa South China Sea.

Tumanggi naman ang China na makilahok sa pagdinig at nanindigan na hindi susundin ang namamagitan sa kanila ng Pilipinas.

Nauna nang sinabi ni Duterte na suportado niya ang kaso laban sa China ngunit bukas din siya sa bilateral talks.

Nais din niya na magkaroon ng joint exploration agreement upang maresolba ang gusot.