Palasyo malamig sa SSS pension hike
MANILA, Philippines – Ipinahiwatig kahapon ng Malacañang na hindi pa tiyak kung aaprubahan ni Pangulong Aquino ang panukalang batas na naglalayong itaas ang tinatanggap ng mga pensionadong miyembro ng Social Security System (SSS).
Ayon kay Usec. Manuel Quezon ng Presidential Communications Operations Office, ‘mabigat’ pang tinatalakay at pinag-aaralan ang nasabing panukala.
Tahasang sinabi ni Quezon na mas iiksi ang buhay ng SSS kung biglang itataas ang pensiyon ng mga miyembro na dapat ay mapakinabangan ng mas mahabang panahon.
“Isipin natin na ang ating SSS ay may pondo…na nanggagaling sa ating mga kontribusyon ang puhunan ng SSS at mula rito doon niya binabayaran ang mga obligasyon niya, hindi lang sa kasalukuyan kundi para sa mga susunod na mga benepisyo. ‘Di ba, tayo may maaasahan tayo ‘pag nag-retire tayo? Babalik sa atin in the form of loans or ‘yung benefits natin. Ngayon, kung biglaang itataas ito, iiksi ang buhay ng SSS,” ani Quezon.
Sinabi pa ni Quezon na dapat ring isipin ang hindi magandang epekto kung itataas ang tinatanggap na pension ng mga miyembro.
“Siyempre, lahat tayo gusto natin lalaki ang ating matatanggap mula sa binabayaran natin sa SSS ngunit hindi lang tayo mag-isa; in other words, ang mga kasalukuyang mag-be-benefit mula rito. Kailangan din nating isipin ‘yung mga down the road. So pinag-aaralan ito,” ani Quezon.
Sinabi ni Quezon na puwede namang magkaroon ng “compromise” pero wala pa ring impormasyon kung lalagdaan ng Pangulo ang panukala.
Ipinaliwanag pa ni Quezon na kung ive-veto ng Pangulo ang panukala dahil hindi siya sang-ayon dito ay ibabalik niya ito sa Kongreso.
- Latest