FOI bill pagtitibayin - Rep. Leni

MANILA, Philippines – Tiniyak ni Liberal Party vice presidential candidate Leni Robredo na maisasabatas ang Freedom of Information (FOI) Bill bago matapos ang termino ni Pangulong Aquino sa susunod na taon.

“Hindi kami nawawalan ng pag-asa, mayroon pa pong ilang buwan bago matapos ang 16th Congress. Very passionate kami na maipasa ang FOI,” wika ni Robredo, kilalang nagsusulong ng FOI at co-author nito sa House of Representatives.

Pasado na ng Senado ang FOI sa ikatlong pagbasa habang nakabinbin naman ang House version sa committee level.

“Iyong version na lumabas sa Senate, parang sinasabi niya, obligado ang gobyernong ilabas ang any information requested by a private citizen. Ang version namin, kahit walang demand, obligasyon ng gobyerno na gawing public ang information,” wika ni Robredo.

Anya, sa tulong ng House version mapapa­lakas ang people empowerment sa pamamagitan ng pagsusulong ng relasyon ng pamahalaan at mamamayan.

Nabuhay ang pag-asa ni Robredo matapos manawagan si Pangulong Aquino sa mga mambabatas na ipasa ang FOI sa huli niyang budget message.

“Noong huling budget message, kasali na ang FOI sa priority bills,” wika ni Robredo.