Assets kokolektahin na ng BIR Pacquiao, Jinkee nagpasaklolo sa SC
MANILA, Philippines – Nagpapasaklolo sa Korte Suprema si World Boxing Champ Manny Pacquiao upang mapigilan ang pagkolekta ng Bureau of Intenal Revenue sa kanyang mga asset para punuan ang umano’y P2 bilyong pagkakautang sa buwis noong 2008 at 2009.
Sa inihaing memorandum sa Kataas-taasang Hukuman, hiniling ni Pacquiao at kanyang misis na si Jinkee na isantabi nito ang bahagi ng inisyung resolusyon na nag-aatas na magdeposito sila ng cash bond na nagkakahalaga ng P3.2B o di kaya ay surety bond na P4.9B para maipatupad ang suspension order laban sa Warrant of Distraint and Levy na inisyu ng BIR laban sa mga bank account ng pambansang kamao.
Ayon sa mga petitioner, hindi nila kakayanin ang halaga ng cash bond na itinakda ng korte dahil ito ay lagpas pa sa kabuuang halaga ng kanilang net worth.
Nanindigan din ang mga Pacquiao na nabayaran na nila nang buo ang buwis na sinisingil ng BIR.
Nababahala ang kampo ni Pacman na tuluyan nang masamsam ang kanilang asset, lalo pa at kinumpirma ng BIR sa pagdinig sa Court of Tax Appeals na itutuloy nito ang pagkulekta sa buwis kung hindi magkakaroon ng bisa ang suspension order ng Mataas na Tribunal dahil sa kabiguan ng mga petitioner na magdeposito ng malaking halaga ng cash bond.
Inihayag pa ng mga petitioner na sinimulan na ng BIR ang collection proceedings laban kay Jinkee nang hindi man lang siya pinadadalhan ng notice kung mayroon nang final decision sa kinukuwestiyong tax assessment.
Iginiit din ng mga petitioner na ito ay malinaw na paglabag ng BIR sa right to due process ni Jinkee Pacquiao.
- Latest