Pagpuri ni Guingona sa testimonya ni Tuason, foul

MANILA, Philippines - Offensive foul ang pagsasalarawan ni Sen. Teofisto Guingona III na isang "3-point buzzer beater" ang mga testmonya ni pork barrel scam witness Ruby Tuason sa pagdinig ng Senate Blue Ribbon Committee hinggil sa naturang anomalya nitong Huwebes.

Ayoon kay Prof. Edmund Tayao ng University of Santo Tomas,  hindi dapat pangunahan ni Guingona ang maaaring maging kahinatnan ng mga kasong pandarambong na isinampa ng Department of Justice laban sa mga kapwa niya senador na sina Juan Ponce Enrile, Jinggoy Estrada at Ramon Revilla Jr.

"Senators should not prejudge the case against their colleague," pahayag ni Tayao sa panayam sa ABS-CBN nitong Huwebes.

Sinabi pa ni Tayao na masyado pang maaga upang magbigay ng mga konklusyon sa maaaring kahinatnan ng mga kasong isinampa laban sa tatlong senador.

"Mahaba pa ito. It’s difficult to say if one side is gaining traction and the other is not," dagdag ng propesor.

Pinuna rin ni Tayao ang paraan ng pagtatanong ni Sen. Antonio Trillanes IV kay Tuason hinggil sa pagkakasangkot ng dating chief of staff ni Enrile na si Gigi Reyes.

Bagaman sinabi na ni Tuason na wala siyang direktang kaalaman sa pagkakasangkot ni Enrile ay inulit-ulit pa rin ni Trillanes kung sa tingin niya ay alam ng matandang senador ang ginagawa ni Reyes.

Sa huli, sumagot din si Tuason na "He might have."

Ayon kay Tayao, nagmukhang pinilit ni Trillanes si Tuason na magbigay ng ganoong sagot.

"She isn't saying categorically that she doesn't think that the senator knows what the chief of staff is doing ... because she doesn't have direct knowledge of it. So yung pipilitin mong sumagot ... it's like suggesting that you would like the witness to say what you want her to say," anang propesor.

Si Trillanes ay kilalang kaaway ni Enrile. Si Guingona naman ay kapartido ni Pangulong Aquino at ang tatlong akusadong senador ay pawang nabibilang sa oposisyon.