Sistema ng LRA at BIR pinagsama

MANILA, Philippines - Lumagda sa isang kasunduan ang Land Registration Authority (LRA) at Bureau of Internal Revenue (BIR) para sa koneksiyon ng kanilang sistema para sa mabilis na pagrerehistro ng mga lupain at maayos na pagkolekta ng buwis sa bansa.

Sa ilalim ng kasunduan, magkakaroon ng isang inter-agency collaboration kung saan ang BIR ay maaaring magpadala sa LRA ng electronic copy ng Certificate Authorizing Registration (CAR) na nakaisyu sa bawat indibidwal para sa transfer ownership ng kanilang lupain.

Ang CAR ay ipalalabas matapos na ang buyer ay nagbayad ng kaukulang buwis para rito.

Ang LRA, bago magpalabas ng titulo ng lupa ay mag-e-scan sa copy ng CAR gamit ang barcode readers na nakatala sa Registries nito upang matiyak na ang data na nakalagay sa CAR ay tugma sa data na nakalagay sa BIR.