Ballistic test sa TF RCBC giit

Hiniling kahapon ni Atty. Harry Roque sa Department of Justice (DOJ) na magsagawa ng ballistic test ang National Bureau of Investigation (NBI) sa mga miyembro ng Task Force RCBC na sangkot sa Tanauan massacre.

Sa preliminary investigation sa DOJ, sinabi ni Roque na makikipagkita siya sa mga abogado ng Commission on Human Rights (CHR) upang makialam na ang mga ito sa kaso at atasan ang Philippine National Police (PNP) upang ilabas ang kanilang balang ginamit.

Ito ay dahil sa ang mga balang ginamit ng mga operatiba ng Task Force RCBC ay hawak pa nila.

Giniit ni Roque na ang nasabing mga bala ay napa­ka-importante bilang physical evidence sa kaso.

Matatandaan na sinampahan ng multiple murder ang mga miyembro ng nasabing task force ni Roque na tumatayong abogado ng mga kaanak ng napatay sa Tanauan massacre.

Humarap din sa pagdinig si Raquel Fortun, ang abogado mula sa Commission on Human Rights at nagsumite ng mga affidavits at annexes ng kanilang testigo kung saan tumestigo din ito at sinabing binaril ng malapitan ang mga biktima.

Wala namang itinakdang petsa ang DOJ para sa susunod na pagdinig sa nasabing kaso. (Gemma Amargo-Garcia)