Kapitan ginunugno sa managsuon

CEBU, Philippines - Gidakop ang manag-igsuong babaye ug lalaki human nila gikatahong gibugbo ang barangay kapitan sa Lagtang, sa Siyudad sa Talisay atol nga gihusay ang ilang kasungian bahin sa yuta niadtong Biyernes sa hapon.

Ang gipadakop sa kapitan mao sila si Jade Payda ug Shace Payda Sumayang. Ang duha pulos di mohatag og  impormasyon kun diin sila magpuyo.

Samtang ang biktima mao si Kapitan Chaster Taboga Salcedo, 47 anyos.

Sa imbestigasyon sa kapolisan  gi-hearing ni Salcedo ang kasungian sa yuta. Matud pa gusto sa mga suspek nga mosud sa hearing aron maminaw o moapil sa mismong husay, apan kay dili man sila direktang apektado wala sila tugoti sa kapitan apan gikatahong nasuko ug giatake ang maong opisyal.

Matud pa gilabnot sa babayeng suspek ang buhok ni Salcedo samtang gisuwayan kini og sukmag igsuon niining lalaki.

Hinuon dali silang napakgang sa mga barangay tanod nga sila si Chito Racaza ug Tereso Reponte ug gipangdakop tungod sa direct assault.

Si Salcedo nitataw nga away sa yuta ang ilang gisuwayan og husay apan sa sinugdanan pa lang sa hearing agresibo na ang grupo nga gipatawag.

Usa ka pribadong indibidwal ang giingon nga tag-iya sa yuta ug gusto na kining gamiton.  Apan gikataho nga ang mga kasamtangang nagpuyo sa luna nga giingong miyembro og usa ka tinuohan dili mosugot.

Si Salcedo mipasabot nga gusto lang unta niya nga husayon ang duha ka habig aron di mosangpot sa bayolenteng aksyon ang ilang panagsungi.

Gituyo sab niya nga kadto rang naa sa subpoena o gipatawag ang ilang gitugotang pasudlon sa husay aron dili gubot.

Si Salcedo miingon nga ang managsuon gituohan niyang mga anak sa lider-lider sa tinuohan sa mga nagpuyo sa maong luna.

Si Police Lt. Col. Randy Caballes, hepe sa kapolisan nga ang duha nga gidakop nagdumili sa pagkooperar sa mga kapolisan, kasong direct assault maoy giandam nga kaso batok sa duha.