Wedding coordinator nga labad

Dear Tito Miguel,

Maayong adlaw, ako diay si Melinda, taga Talisay City . Usa ko ka make-up artist ug kanunay gyud ko kuhaon sa akong higala nga wedding coordinator alang sa iyang mga kliyente .  Taod-taod napud ko nga make-up artist ,ug okay kaayo ang dagan sa among transaksyon kaniadto  sa akong higala nga wedding coordinator. Apan niadtong Enero karong tuiga , permi naman kulang ang iyang ibayad uy, dunay usahay nga unya-unyaon ra ang bayad. Hangtodnaabot sa punto nga dako na kaayo siya og balanse dinhi kanako. Nagpatong-patong ang mga kulang. Magsige ko og paningil, pero  i-seen raman ko sa messenger uy. Wala masulod sa akong huna-huna nga pasakaan siya og kaso kay lage soud kaayo mi nga maghigala. Unsa puwede nakong buhaton Tito Miguel  nga inamiga nga pamaagi aron mabayran gyud ko niya ? Or panahon na ba na ako siyang ikiha?  Daghang salamat. — Melinda

* * *

Melinda,

Daghan og  pamaagi unsao’g paningil nga dili ka maikog ug dili siya malain. Gani, sa tinuod siya ang dapat maikog ug ikaw ang dunay katarungan malain. Apan lagi kay ato man nang kultura’g pamatasan nga maikogon maski kita ang agrabyado, pangitaan lang nato’g pamaagi nga dili siya masakitan. Ipaagi’g binuang. Ingna wa na ka’y ikagasto sa imong laki, mahadlok ka nga basin biyaan ka. Kun igo ra mokatawa, ingna wala ka magbinuang, apan hapit na ka mabuang. Kun mobalibad ug mosaad, ingna ma’s maayo mag-una iyang bayad kaysa nga mabiyaan ka sa imong ka-relasyon.

Kun i-seen zone gihapon ka, ingna bitaw seryoso ka, apan kay amiga man mo, paaboton lang nimo kun kanus-a siya makabayad. Apan mas maayo sayo ka’y hasta ikaw nagkalisod, o dunay petsa aron ma-budget nimo imong kuwarta. Kun tubagon ka’g mangayo’g pasensiya, ingna lang makapaabot ka apan lagi kinahanglan duna’y petsa. Kun i–seen zone gihapon ka, ingna ka’y wa man siya nitubag, buot pasabot wala siya’y plano nga kanimo mobayad.

Kun kaya ra nimo mapasaylo iyang utang, kalimti na lang. At least nailhan na nimo iyang batasan. Pero kanimo dili na siya kausab. Apan kun apiki gyud ka’g dili makapaabot, tinud-a na. Ingna dili sab makiangayon nga imong kahago masuwat lamang sa tubig. Kun nagkalisod siya, samot na ka.

Kun wa gihapo’y mahitabo, sa abugado o barangay mahimo na ka modangop. Apan duna ba moy kasulatan nga iyang pinirmahan? Kay kun wala, basin wala ka’y ebidensiya magamit batok niya. — Tito Miguel

Magpatambag ka? Ipada kang Tito Miguel: 0991-318-9366