Mahalon ang gusto

Dear Tito Miguel,

Maayong adlaw, ako diay si Jan, taga Mandaue City. Naproblema ko sa akong ka-live in partner nga si Charisa kay grabe ka arte. Gusto ra ko og simple nga kinabuhi. Susama ming duha nga dunay nindot nga trabaho .Kung mag-date mi, gusto gyud siya sa social nga mga lugar. Kapila nako sige og hangyo niya nga mas maayo nga yano lang gyud unta kung mag-date mi, apan dili gyud siya mosugot. Grabe gyud siya ka social.  Kun mobakasyon mi, dapat luxury hotel gyud na. Kun naay birthday sa among barkada, dili na siya motunga basta inato ra nga mga celebration. Unsaon mani nako siya Tito Miguel? — Jan

* * *

Jan,

Ayaw lang pugsa o pakaliti nga undangon o usbon iyang lifestyle. Labi na’g siya ra mogasto. Pero kun kamo duha, kinahanglan siya mo-adjust panagsa. Bisan pa wala mo’y problema sa kuwarta nga igasto sa mga mahalon nga kan-anan ug hotel, kinahanglan gihapon balansehon. Klaro nga gianugnan ka, busa kani ang buhata.

Klarohi siya pila ra imong kaya igasto alang sa inyong mga date o laag. Kun kaya niya pun-an, ok ra. Apan iklaro nga ang imong rason ka’y gusto ka magtigom alang sa inyong kaugmaon, dili kay magtinihik ka o imo siya gihikawan sa iyang lingaw o gusto. Kun dili mosugot, mamugos nga tunga mo o dili ba kaha ikaw ra tanan gasto, red flag kana. Buot pasabot sa kinabuhi dili ka niya katimbang, basin pa igo ra ka tumban tumban. Selfish siya. Mahimo sab ka makigsabot nga puli-puli mo’g pili sa lugar. Kun karon ngadto mo sa mahalon nga iyang gusto, sa sunod ngadto na sab sa baratohon nga imong pili-on. Give and take ba. Karon kun dili siya mokuyog nimo sa baratohon, angay na ka magduha- duha. Ka’y ang inyo raba isaad sa usa’g usa, labi na’g kaslon mo, nga mag-unong mo sa kawad-on o sa kaadunahan. Unya’g minyo na mo’g kalit ka mawad-a’g trabaho o dili ba kaha mabaldado, basin biyaan ra dayon ka ora mismo. — Tito Miguel

Magpatambag ka? Ipada kang Tito Miguel: 0991-318-9366