Maglalis sa politika

Dear Tito Miguel,

Maayong adlaw, ako diay si Shannie, taga Poblacion Pardo, Cebu City. Akong problema karon kay akong boyfriend nga si Joshua Phillip kay makiglalis gyud sa akong baruganan sa politika. Dili na unta ko motingog aron dili nami maglalis, apan iya gyud ko nga i-provoke, hangtod nga mag-away nalang mi.

Ako siya giingnan nga kinahanglan respitoon namo ang among tagsa-tagsa nga baruganan. Bisan kapila nako nitambag niya, makiglalis gihapon uy.  Nakaingon ko, maypa wala nalang ko mosulti niya sa akong botaran da. Pila na ka weeks nga nagsige mi og lalis, toxic na kaayo. Unsa ang angayan nakong buhaton Tito Miguel? Salamat kaayo. — Shannie

* * *

Shannie,

Ang hisgotanan sa politika ug relihiyon wala’y mananaog, labi na’g pareha na sirado inyong hunahuna. Busa likayan na lang kini aron dili na mo maglalis nga walay padulngan. Ayaw na paghisgot kinsa imong botaran, ayaw na depensa sa imong baruganan.

Kun siya ang maghisgot, paminawa’g tando lang. Ayaw na supaka, ayaw na lalisa. Ka’y iyang gusto mapamatud-an nga insakto siya’g sayop ka. Ihatag na lang na kaniya. Dili man tingali magsakit imong tiyan kun imo siya pagbigyan.

Kun pugson gyud ka’g patubag o hagiton ka sa debate, ingna lang insakto siya. Kun masuko kay magduda nga gisakyan lang nimo siya, ingna di ba mao na iyang gusto ang mouyon ka sa iyang punto. Busa dili na kinahanglan pa lalisan.

Apan tingali sa imong ilawom maglungot-lungot ka. Kalma lang, pugong lang. Kay maski unsa pa imong isulti, maski insakto pa ka, dili na siya maminaw kanimo o ni bisan kinsa kay sirado na iyang hunahuna. Dili na mausab iyang baruganan.

Busa walay gamit ang inyong panaglalis. Nag-usik lang ka sa panahon, apektado pa imong hunahuna ug gibati ug mismo ang inyong relasyon tungod lamang sa mga politiko nga wala man gani makaila kaninyo. Angay ninyo pahinumduman inyong kaugalingon nga gugma ang basehan sa inyong relasyon, dili politika o relihiyon. — Tito Miguel

Magpatambag ka? Ipada kang Tito Miguel: 0991-318-9366