Alexa dunay awit kalabot sa kahadlok sa gugma

Ang kahadlok sa gugma maoy gihisgotan  sa singer-actress nga si Alexa Ilacad sa  bag-o niya nga awit nga "Kung Naging Tayo."

Gipaambit ni Alexa sa  maong awit  kung unsa ang epekto sa kahadlok ug pagduhaduha sa sinugdanan sa gugma. Gisuwat kini ni Angelica Tagdadad ug gi-produce ni ABS-CBN Music creative director Jonathan Manalo.

Kauban ni Alexa sa official music video sa "Kung Naging Tayo" mao  ang bag-ong Kapamilya star nga si Emilio Daez.

Kahinumdoman nga niadtong Abril, gi-release sa StarPop artist ang iyang solo nga bersyon sa Star Magical 2024 Prom theme song nga "Believing In Magic (Yakap Mo)" nga nakaani og kapin sa usa ka milyon nga streams sa Spotify.

Isip usa ka aktres, nabantog si Alexa pinaagi sa pagbida sa lainlaing serye sama sa “Bagito,” “The Good Son,” “The Killer Bride,” ug “Pira-Pirasong Paraiso.”

Sa pagkakaron makita siya isip usa sa mga host sa "Pinoy Big Brother Gen 11."

Madungog  ang bag-ong awit  ni Alexa nga "Kung Naging Tayo"  sa nagkalain-laing   streaming platforms. 

Liza balik-serye na

Malipayong gipahibalo ni Liza Soberano nga mobalik na siya og lugwa sa mga serye.

Wala hinoun gidetalye sa aktres kun unsa  nga    platform  makita ang maong proyekto.

Malakip usab siya   sa reality show ug pelikula.

Mipalit og balay

Hingpit na gyud nga napalit ni Seth Fedelin ang balay nga taod-taod na nga giabangan sa iyang pamilya.

Mao kini ang nagsilbi niya nga regalo ngadto sa iyang ginikanan. Nipalit usab siya og property  doul sa maong balay aron mas doul siya sa  iyang pamilya.

Nagoul sa pagbiya ni Ivana

Giangkon ni Coco Martin nga nagoul gyud siya og maayo sa pagpanamilit  ni Ivana Alawi sa FPJ's ‘Batang Quiapo. Dugang pa ni Coco nga bisan sakit  dawaton, nakasabot ra gyud siya sa rason sa pagbiya ni Ivana. 

Una na nga gibutyag ni Ivana nga duna pa siya'y nakalinya nga mga proyekto  nga angayan niyang buhaton busa nananghid  gyud siya og tarong sa pagpanamilit sa maong teleserye. 

Kahinumdoman nga tulo ra gyud unta ka buwan ang partisipasyon sa aktres sa maong programa apan nalapas kini human ni-click ang tandem nila ni Coco.

Major concert

Makabaton ang singer nga si Maki sa iyang  first-ever major solo concert karong  Nobyembre. Gipublikar na sa  Tarsier Records ang  official poster sa maong konsyerto  nga pagahimoon sa  New Frontier Theater sa Quezon City karong Nobyembre  29. Si Maki maoy nagpasikat sa awit nga Dilaw.