Dear Tito Miguel,
Maayong adlaw! Ako diay si Feliz, taga Mabolo, Cebu City. Naa koy problema, akong uyab nga si Jay kay wala na may gana sa kama uy. Feel nako, naa na siya'y lain . Sakto ra ba kaha ni akong pagduda? Wala koy kaisog nga mo-confront niya kay basin mao na hinuon ni ang among awayan. —FELIZ
Feliz,
Dunay pipila ka rason ngano magkahupas ang gana sa kama. Kun dugay na mo, basin nahilis na ang pagnanasa, nasulbad na ang misteryo, natagbaw na. Pero dili buot pasabot wa na ka higugmaa. Naa lang gihapon, apan lahi na iyang pamaagi pagpadayag niini. Sama ra gud sa inyong mga ginikanan, di na gani magdulog matulog.
Posible sab sum-ol na, balik-balik na inyong gibuhat, wala’y bag-o, wala’y simang. Pag-eksperimento. Kun unsaon, pangitaa ninyo, mao nay nakapahinam-hinam sa pakighilawas, ang maka-diskubre sa wala damha. Usahay tungod sa edad, kun batan-on pa, maski ka pila, kun edaran na, maibanan na. O dili ba kaha dunay medical, physical o psychological nga rason. Wa ka mag hisgot nagtrabaho na ba siya o estudyante pa. Kay posible sab kapoy na siya sa trabaho tibuok adlaw.
Basin sab nausab na imong lawas o hitsura, dili na ang iyang gihinam-hinam sa una. Apan dili ni imong sala, buot pasabot lawas ra iyang giaapas kanimo, dili ikaw mismo. Posible sab para niya wala siya nausab, apan imong gusto nisaylo, wala na mo magsugat. Pero dunay purohan nga sakto ka, naa siya’y lain. Pero kun gusto ka makahibawo sa tinuod, ayaw pangutan-a, kay sigurado molimod. Molimod man gani maski nasakpan na, unsa na lang kun imo ra pangutan-on.
Busa ayaw pangutan-a, kay makamatngon hinuon, samot motago. Patay-mali lang, ayaw ingna nagduda ka, kay ma-alerto beinte kwatro. Panahon ang mosulti sa kamatuoran. Ang tawo mamakak pinaagi sa dila, ang panahon mokumpisal pinaagi sa ebidensiya. Tito Miguel
Magpatambag ka? Ipada kang Tito Miguel: 0998-581-5856