CEBU, Philippines — Gitambagan ni Kylie Padilla ang mga kababaenhan nga dili gyud mo-surrender bisan pa man sa giatobang nga mga pagsulay. Usa usab sa iyang estilo nga dili gyud manumbaling sa mga istorya sa ubang tawo.
Nanumpa na
Gikasal na sila si Oriental Mindoro Vice Governor Ejay Falcon ug ang iyang hinigugma nga si Jana Roxas niadtong Sabado. Usa kini ka Christian wedding ceremony nga gipahigayon didto sa Enderun, Taguig City.
Angel giidolo ni Jane
Giidolo ni Jane de Leon ang aktres nga si Angel Aquino gumikan kay kahibalo gyud kini morespeto sa iyang mga katrabaho. "She’s like a mother-ate and bestfriend to me. Si Ms. A kasi ang sarap niyang kasama kasi hindi siya nagdya-judge ng ibang tao," saysay pa ni Jane sa interview niini kang Darla Sauler sa Kumu.
Karisma ni Kuh nagpabilin
Nakadawat og masipang pakpak o mga abiba ang beteranang aktres nga si Kuh Ledesma ug ubang performers sa bag-ohay lang nga dinner concert for-a-cause nga gipasiugdahan sa Philippine National Police Officers' Ladies Club (OLC) Region 7.
Ang "AMORE: A Night of Music and Compassion" nahitabo niadtong Sabado sa Waterfront Cebu City Hotel and Casino.
Una na nga gibutyag sa presidente sa OLC sa Region 7 nga si Leslie Lim nga ang mga benipesaryo sa maong kalihokan mao pipila ka mga personnel sa PRO-7 ug ilang mga dependents nga naghambin og cancer. Gawas kang Kuh, ni-perform pud sa maong kalihokan sila si "Popera Artist" Jonathan Badon, "Charity Diva" Token Lizares, "Asia's Got Talent" semi-finalist Angel Mistress, ug "Boholano Pop Prince" Genreid Estrada.
"BINI" gipadungog na!
Gipalanog na dili pa lang dugay ang bag-ong awit ni Jeremy G nga "BINI" nga naghisgot sa tawong maulaw mopabahagay sa iyang gibati ngadto sa tawo nga iyang gihigugma.
“Coming from the break-up anthem ‘Sinayang Mo,’ I think that ‘BINI’ will give listeners a new feel and different side of me, since this song is basically about falling for a girl but being too shy to tell her face to face,” suma pa Jeremy.
Unang nailhan si Jeremy sa dihang nisalmot kini sa “The Voice Teens Philippines” season 1.
Lit-ag gihimoan og remake
Usa sa gikabisihan karon sa beteranong direktor nga si Sam Costanilla mao ang Lit-ag:The Remake nga gibitoonan sa dili basta-basta nga mga artista dinhi sa Sugbo.
Nasayran nga si Al Evangelio ang orihinal nga nagsuwat niini ug gi-revised kini sa iyang anak nga Lorenz Evangelio. Nalakip sa maong short film sila si Zennith Rivera, Dan Lopez, Johar Lapasaran, Joan Flores, Jugie Gonzales, Atty. Selwin Prada, Jehmel dela Riarte, Arnel Pahang, Ringo Jay Trinio, Xian Sotto, Anadel dela Riarte, Floie Belle Spearson, Anne Balagas, Demi Luna, Doris Banaynal, ug Jecar Enopia. Ang mga personalidad nga naa luyo sa kamera mao sila si Alan Lucar (IT and website), Miraflor Gacayan (Production Assistant), Armbo Borg (cinematographer/ video editor). Ang maong short film nagtuyok sa istorya sa pamilya gugma, pagpasaylo, ug respeto sa usag-usa. Makita ang Lit-ag karong Biyernes Santo, Abril 7, 2023, pinaagi sa FB Page ug YoTube channel sa The Other Side of Me.
Mga kalingawan sa Alturas gihangop
Nagmalampuson ang comedy concert nga gilangkoban sa YouTube sensation nga si Justin Tan ingon man usab ang laing performer nga gikan sa kaulohan nga si Amazing Peanut.
Ang maong kalihokan gipahigayon sa Island City Mall sa Tagbilaran City ,Bohol niadtong Sabado sa gabii ug kabahin kini sa naglinya nga mga kalihokan alang sa selebrasyon sa 50th anniversary sa Alturas Group of Companies.
Gawas sa sayaw, kanta, ug katawa, nagbaha usab ang mga pa-premyo niadtong gabhiona pinaagi sa nagkadaiyang games.
Ni-perform usab atol comedy concert ang sikat nga mga dance group sa Bohol , ang Technotronic ug The Boys Selection.
Sa wala pa ang maong kalihokan, gihimo pagkabuntag ang Golden Fun Run nga dunay 2,500 ka mga partisipante .
Ang kita sa fun run kay itabang sa mga bata nga naghambin og balatian.
Pag-abot sa hapon, gihimo dayon ang kapin duha ka oras nga Golden Zumba Marathon ug gisalmotan kini sa 400 ka mga tawo.
Duna pa'y nagbaha nga mga kalihokan ang Alturas karong tuiga.
Gipaneguro sa maong kompanya nga ipaambit ngadto sa katawhan ang mga kaayohan nga ilang naangkon pinaagi sa Alay Marcela Foundation.