Dili Exclusive

Sa Lunes, November 28, magsugod ang morning show nga M.O.M (Mhies On Mission) sa AllTV. Hosts niini sila si Mariel Rodriguez, Ciara Sotto ug Ruffa Gutierrez. Giklaro ni Ruffa nga contract sa programa ra iyang gipirmahan sa nahisgutang TV station, busa mahimo pa siya nga molugwa sa laing estasyon basta dili lamang kumpetensya sa ilang morning show. Matud ni Ruffa, alang lamang matud pa ang exclusivity sa mga batan-ong artista, pero ang mga susama na niya angayan nga gawasnon nga motrabaho sa bisan asa nga network.

Mag-artista sa Korea

Nipirma na og kontrata sa South Korean talent agency nga Five Stones Entertainment ang kanhi Goin Bulilit star nga si Kristel Fulgar. Apan dali niya nga giklaro nga dili pa gyud siya mag-artista didto sanglit dili pa siya lareno sa pinulongan sa maong nasud. Gikinahanglan lamang niyang mopirma og sayo aron makaangkon siya og working busy. Wala matud pa siya'y expectation sa iyang pagpanimpad sa South Korea,nag-enjoy lamang siya pagkakaron ilabi na nga nasayud siya unsa ka higpit ang duwa sa showbiz didto itandi dinhi sa nasud.

Winner sa Vietnam

Nidaog isip Best Asian Film sa bag-o lamang gipahigayon nga 6th Hanoi International Film Festival didto sa Vietnam ang pelikula nga "Kontrabida", nga gibituonan ni Superstar Nora Aunor. Giulohan didto og The Villain, mao kini labing unang higayon nga nagkontrabida ang superstar sa tibuok niyang showbiz career. Ubos sa direksyon ni Adolf Alix Jr., kauban ni Nora niining maong pelikula sila si Bembol Roco, Jaclyn Jose, Rosanna Roces ug Julia Clarete. Artista nga ginganlan og Anita Rosales ang karakter ni Nora sa maong pelikula diin gipakita ang kinabuhi sa usa ka aktor atubangan ug luyo sa camera. Gipaabot pa nga isalida sa mga sinehan dinhi sa nasud ang Kontrabida.