"Inconvenient Love"

CEBU, Philippines — Human siya nidaog isip Outstanding Asian Star sa Seoul International Drama Awards sa South Korea, ang sunod nga tinguha ni Belle Mariano mao nga makadawat og pasidungog ang iyang gihimo karon nga pelikula kauban si Donny Pangilinan ug nga magmalampuson sab kini sa international market.  Kini mao ang "Inconvenient Love" nga iyaha sa Star Cinema.

Makahadlok si Valentina

Umaariba na ang pagkamangtas ni Valentina sa Mars Ravelo's Darna. Apan ang mga kriminal pa maoy iyang target. Dungan niini, daghan ang nakauyon sa abilidad nga gipakita ni Janella Salvador isip Valentina. May mga netizens nga niingon nga mahadlok matud pa sila kang Valentina kay dili pabebe ang akting. Si Janella gyud matud pa ang ilang giatangan kada gabii.

Ka Gwapa!

Daghang nahugyaw sa kaanyag ni Jane de Leon isip bida sa Mars Ravelo's Darna sa ABS-CBN. Suma sa netizens dili sab gyud mabentahaan ang kagwapa ni Jane ilabi na kun mulupad na siya. May mga nidepensa sab niya kay matud pa, husto ra ang iyang akting, sukwahi sa kanunayng giingon sa bashers nga yaya siya.

Kapamilya gyud

Natuldukan na ang huhungihong nga mobalik na si Jake Cuenca sa GMA7. Kini human gikumpirma sa ABS-CBN Star Creatives nga malakip sa cast sa teleseryeng Iron Heart si Jake. Bida niini si Richard Gutierrez kauban sab sila si Sue Ramirez ug ang nibalik kapamilya nga si Maja Salvador. Dinhi sa Cebu matud pa himuon ang tanang eksena sa maong serye. Kahinumduman nga nigawas dinhi sa Banat Hugyaw kagahapon nga nasigpatan sila si Maja ug Richard nga nagtaping sa Dalaguete, Cebu bag-ohay.

Nilaag sa London

Nitan-aw sa Laver Cup o tennis tournament didto sa London si John Lloyd Cruz kauban ang gihungihong nga uyab niya nga si Isabel Santos. Komento sa netizens masanag ang dagway karon ni John Lloyd, indikasyon nga kontento siya sa iyang kinabuhi karon ug nakabaton og kalinaw sa hunahuna.

Ka hugyaw!

Nahugyaw si Mariel Rodriguez sa iyang suod nga higala nga si Toni Gonzaga kay nakahimo pa kini pagshoot og pelikula bisan sa ka busy niini. Dugang pa ni Mariel, nanimbawot iyang balhibo ug malipayon siya alang kang Toni. Gi-upload ni Toni sa nilabay nga adlaw ang pipila ka mga hulagway sa ilang Metro Manila Film Festival entry ni Joey de Leon nga giulohan og "My Teacher". Apil sab niini ang manag-uyab nga Ronnie Alonte ug Loisa Andalio.

Naapil sa demalas!

Giatake na sab ni Lolit Solis si Bea Alonzo pinaagi sa pagkomento nga nadamay si Alden Richards sa demalas sa aktres. Post ni Lolit sa Instagram kagahapon, wala matud pa kaayo hangupa sa publiko ang pilot episode sa Start Up ni Bea sa GMA7 niadtong Lunes kay tita na og dagway ang aktres. Usik matud pa nga napagan si Alden kay nindot ra ba gyud unta ang project. Nasayran nga 9.7% ang rating sa pilot episode sa Start Up. Naka 21.3% ang 24 Oras ug 18% ang Lolong. Matud ni Lolit, wala nay star power si Bea.

Okay ra gyud

Bulawanon ang mga pulong nga gipaambit ni Dimples Romana sa iyang post niining bag-o lang. Suma pa sa banggiitang aktres, workaholic gyud siya. Apan nakaamgo siya niining mga nilabay nga semana nga okay ra diay matud pa kun mohinay hinay lamang pud. Okay ra pud niya pa nga wala kaayo kay daghang butang, ug ang imong gihuptan mao ra gyud ang imong gikinahanglan. Okay ra pud niya pa kun morelax panagsa ilabi na kun gikapoy.

Sunshine: I prayed

Nagpasalamat si Sunshine Cruz sa positibong reaksyon sa publiko sa ilang blended family o ang sitwasyon diin nagkahiusa na ang bag-ong pamilya ni Cesar Montano ug siya usab kauban ang ilang mga anak.

Kahinumduman nga nitambong si Cesar sa birthday party sa ilang anak ni Shine nga si Angelina Cruz niadtong September 23. Didto nahimamat sab ni Shine ang partner karon ni Cesar nga si Kath ug ilang mga anak.

Sa latest post ni Shine niingon siya: Hey guys! Salamat sa napakagagandang comments nyo. I’ve read it and nakakatuwa na makita that you guys appreciate our (blended) family. Masayang masaya especially ang mga bata and their happiness is my happiness."

Matud ni Shine, niabot na siya sa punto nga gilubong na niya ang mga panghitabo sa ilang kagahapon ni Cesar.

Dugang niyang post: “Masayang masaya especially ang mga bata and their happiness is my happiness. Dumating na sa amin ang oras na kalimutan ang past, move forward and to have a better relationship.

“We are family afterall. Sabi ko nga ‘in God’s perfect time’. I prayed and I believed that this will eventually happen and it was given to me and my family. [praying hands, heart emojis]"