Wow, Ivana!

CEBU, Philippines — Subling nipaambit si Ivana Alawi sa iyang blessings human usab nikabat na sa 15 million ang iyang Youtube subscribers. Busa, isip pasalamat, nanghatag siya og 8,000 food packs, nga may pakapin nga P150, ug champorado nga siya mismo ang nagluto. Nilibot siya ug ang iyang pamilya sa mga dapit sa Metro Manila aron mopaambit ngadto sa nanginahanglan. Matud ni Ivana, 15, 000 food packs gyud unta ang iyang plano, apan sila sila ra man sa iyang pamilya ug mga katabang, 8000 ra gyud ilang nakompleto sulod sa tulo ka mga adlaw. Ang matag food pack adunay sulod nga bugas, de lata, Korean rice cake snacks, ug soap bar nga gikan sa mismong skincare brand ni Ivana. Sa iyang latest vlog, nagkanayon si Ivana: “Sobrang thank you sa inyo for watching and supporting us and loving us and subscribing to us. Sobrang blessed ako na nandiyan kayo. Super ibabalik namin lahat ng blessings na ibinibigay niyo sa amin, and also the love and support na ibinibigay niyo sa akin at sa pamilya ko.” Kahinumduman nga niadtong 2021, nanghatag sab si Ivan og food packs ug cash pag-abot sa iyang subscribers og 13M.

“Sobrang blessed”

Giangkon ni John Prats sa vlog interview ni Bianca Gonzales nga giulohan og #TrusttheProcess: John Prats, nga diriyot na gyud unta siya mobalhin sa GMA7 niadtong naminyo na siya ug mabdos na ang iyang asawa nga si Isabel Oli, sanglit twice a week lamang ang iyang taping,  busa dili maigo ang iyang talent fee alang sa ilang panginahanglanon. Apan nahibaw-an matud pa ni ABS-CBN executive Cory Vidanes ang iyang plano, hinungdan nga gipugngan siya. Naminaw matud pa siya kay dako niyang kalipay nga gipugngan siya sa iyang pamilya. Wala nagdugay, nalakip siya sa cast sa FPJ’s: Ang Probinsyano. Usa sa mga director si John Prats sa maong teleserye nga matapos na ugma human sa pito ka mga tuig. Dili matud pa lalim iyang mga naagian sa showbiz sukad siya nasulod niadtong 1992, isip sakop sa Ang TV. “Sobra yung journey na natutunan ko sa buhay, na you just have to trust God and just do your best. Hindi mo alam minsan kung saan ka nili-lead, akala mo dito, pero hindi diyan dito ka. Lahat ng nangyayari sa akin ngayon, sobrang blessed ako kasi ang dami kong natutunan.”

Okay man sila…

Gipaneguro sa mga nakapalibot nila kang Heart Evangelista ug Senator Chiz Escudero nga okay sila, o walay problema ang ilang kaminyuon. Niulbo ang maong pagduda human gitangtang ni Heart ang Escudero sa iyang ngalan sa Instagram niadtong nilabay nga adlaw. May mga nangagpas nga for branding lamang kini, sanglit daghan na kaayo og apelido si Heart, adunay Ongpauco, Evangelista ug Escudero. Maglibog na matud pa ang mga kliyente ilabi na ang foreigners. Napun-an pa kay sa nilabay nga GMA Gala, daw wala matud pa sa mood si Heart, kauban ang iyang bana, daw adunay gipas-an nga suliran. Ug, may post sab si Heart nga walay gisul-ob nga wedding ring. Apan matud pa, busy lang matud pa ang magtiayo sa ilang tagsa-tagsa ka mga trabaho, ug walay basehanan ang pagduda nga nagkaproblema sila.

Mama na

Hingpit na nga giangkon ni Badjao Girl Rita Gaviola nga aduna na siya anak, basi sa iyang latest IG post, diin nagkugos siya og baby. Dungan niini, may nanukmat kang Rita gumikan kay gihimakak matud pa niini sa Tiktok ang maong tsika sa nilabay nga bulan, ug nagpahilak-hilak pa. Apan, gitubag ni Rita ang netizen ug giingnan nga mas kupal kini kay nanghilabot sa kinabuhi sa ubang tawo. Gitubag sab niya ang niingon nga giusikan lamang niya ang iyang career, pinaagi sa pag-ingon nga walay mausik. Viral si Rita pipila ka tuig na ang nilabay human nga nakuhaan siya og hulagway nga nagpakilimos. Daghan ang nadani sa iyang ka anyag, hangtud nga nakaapil siya sa Pinoy Big Brother reality show. Niadtong February, nisalmot siya sa Sexy Babe contest sa It’s Showtime, diin nahimo siyang daily winner. Social media influencer na siya karon.

Sa UH molugwa

Kumpirmado na gyud matud pa ang pagbalik ni Matteo Guidicelli sa GMA7 diin mamahimo siyang co-host sa GMA7 morning show nga Unang Hirit. Suma pa, mahitabo kini karong bulana. Mailhan ra matud pa kini sanglit ma-busy na si Matteo sa musunod nga mga adlaw aron pagpromote sa iyang pormal na nga pagsulod sa 22-year old morning show sa GMA7. Kanhi cast si Matteo niadtong 2009, sa SOP Fully Charged, ang kanhi Sunday noontime show sa GMA7.

Valentina, naghinamhinam

Walay direkta nga pagkumpirma si Janella Salvador sa taod-taod na nga huhungihong nga nagbulag na sila ni Markus Paterson, apan kun imong sabton ang iyang pamahayag, tataw nga giangkon na niya nga natapos na ang ilang relasyon. Dihang gipangumusta ang relasyon nila ni Markus, niingon si Janella nga okay sila, at peace, ug ang priority nila mao ang ilang duha ka tuig na nga anak nga si Jude. Dihang gipangutana kun buot ba niya nga non-showbiz ang iyang musunod nga hinigugma, niingon si Janella nga dili siya mamili, ang importante higugmaon siya. Nahinabi si Janella sa PEP atol sa grand media launch sa Darna niadtong Lunes. Si Janella ang main kontrabida isip Valentina, ug niya pa, mao gyud kini ang role nga dili niya makalimtan, gumikan kay labihan ka challenging alang niya. Gipangandaman gyud kini niya og maayo, ug excited na siya nga makita na sa publiko ang ilang gihaguan. Gidayeg sab niya ang Darna nga si Jane de Leon kay niya pa aduna gyud kini dedikasyon sa trabaho, ug gikalipay niya nga subli silang nagkatrabaho ni Joshua Garcia. Sa Lunes na, August 15, mulugwa sa Kapamilya Channel, TV5 ug A2Z ang Darna.

“Hipon Girl” sa Senado

 Nirampa sa Senado si Bb. Pilipinas first runner-up Herlene Nicole “Hipon Girl” Budol niadtong Martes. Nag-courtesy call siya sa opisina ni Senator Raffy Tulfo. Suma pa ni Tulfo, “Si Herlene ay nagsisilbing inspirasyon at magandang halimbawa para magpatuloy sa pagsusumikap at pag-abot ng mga pangarap.” Nahimamat sab ni Hipon Girl didto ang mga senador nga sila si Pia Cayetano, Bong Go, Bato dela Rosa ug Robin Padilla.

Anakan nga MU?

Sibaw ang taho online nga modawat na og minyo ug adunay mga anak ang Miss Universe pageant sugod sa 73rd edition o sunod tuig. Ang tsika, gipahibawo na ang national directors sa nagkdaiyang nasud kabahin niini aron mausab nila ang ilang guidelines. Apan ang age requirement nagpabilin sa 18-28 years old lamang gihapon ang mamahimong moapil.