Proud sa iyang pagka-Cebuana

CEBU, Philippines — Gibutyag sa usa sa mga miyembro sa Kapamilya group nga  BINI nga si Aiah nga gipasigarbo gyud niya didto sa kaulohan ang iyang pagka-Sugbuanon.

Atol sa virtual presscon sa miaging adlaw,  gibutyag niya nga dili gyud basta-basta ang mga Sugbuanon kun maghisgot og nagkadaiyang talento sama sa  pagsayaw ug pagkanta.

Dakong garbo alang lang Aiah nga malakip  sa grupong BINI nga gilangkoban og pure nga mga Pinay.

Kauban niya sa maong grupo sila si Colet, Maloi, Gwen, Stacey, Mikha, Jhoanna, ug  Sheena.

Dili pa lang dugay, gipalanog na ang nagkadaiyang version sa  ilang debut single nga  “Born to Win".

Gi-feature usab  ang  music video niini  sa  MTV Asia.

DongYan bida sa anibersaryo sa GMA Pinoy TV

Dingdong Dantes ug Marian Rivera maoy pipila lang sa mahimong bida sa kasaulogan sa 16th anniversary sa GMA Pinoy TV. Nasayran nga  pipila ka mga programa ang idalit sa ilang viewers isip pagsaulog sa ilang anniversary month. Makita karong August 8 sa mga Kapuso sa abroad  ang DongYan movie kaniadto  nga  “You To Me are Everything”.

Nagsugod na  usab kagahapon ang reality game show nga  “Catch Me Out Philippines” nila ni Jose Manalo ug Derrick Monasterio. Mosikad usab karong adlawa ang “Nagbabagang Luha,”  nga usa ka highly-anticipated TV adaptation sa 1988 blockbuster film.

Pagabitoonan kini nila ni Glaiza de Castro isip Maita Montaire,  Rayver Cruz isip Alex Montaire;  Mike Tan isip Bien de Dios, ug Gina Alajar isip Mrs. Calida Montaire.

Nawili ang fans

Nag-trending gyud ang finale   sa “He’s Into Her" nga gibidahan nila ni Donny Pangilinan ,Jeremiah Lisbo ug Belle Mariano.  Nanawagan ang ilang fans nga hatagan og follow-up project ang tulo ka mga bida. Ang maong programa gihulagway nga napuno sa pakilig nga mga eksena.

Gikulbaan kang Julia

Giangkon ni Coco Martin nga gikulbaan  siya og maayo  kaniadto sa dihang gisultihan siya nga mosulod sa Ang Probinsyano ang aktres nga si Julia Montes. Taod-taod na nga gidungog nga dunay relasyon sila si Coco ug Julia.

"Tawa-Tawa"

Gipalanog na ang debut single ni FANA nga "Tawa-Tawa" nga nagtangag og mensahe alang sa mga wala nagtinarong sa ilang hinigugma. Gipamatud-an sa  21-anyos nga singer ang hugyaw niya nga karisma sa maong awit  nga sinulat nila ni  Kikx Salazar ug  ABS-CBN Music creative director Jonathan Manalo. Nailhan si FANA sa publiko sa dihang nisalmot kini sa  “Idol PH” niadtong 2019. Ni-audtion usab kini sa  “The Voice Teens” season 1 niadtong 2017.

Daghan ang natabangan

Gipasigarbo og maayo ni Vice Ganda ang programa niya nga  “Everybody, Sing!” gumikan kay bisan kapin pa lang kini sa  usa ka buwan, daghan na gyud ang natabangan niini.Kahinumdoman nga natabangan na niini ang pipila ka  community pantry volunteers, massage therapists, ug mga magtutudlo.Ang maong programa makita sa  Kapamilya Channel, Kapamilya Online Live, A2Z, iWantTFC, ug  uban pa nga Kapamilya digital platforms.

Awit ni Sab

Pormal na nga gi-release sa Star Music  ang awit  sa indie pop singer-songwriter nga si Sab. Kini nag-ulohan og  “Sunsets and Heaven".  Nalakip kini sa  mini-album nga gi-produce ni ABS-CBN Music creative director Jonathan Manalo. Madungog ang “Sunsets and Heaven” sa nagkadaiyang  digital music streaming services, ug naka-upload usab kini account sa Star Music sa  Facebook, Twitter, Instagram, kumu, TikTok, ug YouTube.

Dennis motambong sa Venice FilmFest  

Tambongan gyud ni Dennis Trillo ang 78th Venice International Film Festival nga mahitabo sunod buwan didto sa Italy. Nasayran nga nalakip sa maong film festival ang pelikula niya nga  On The Job: The Missing 8 nga ubos sa Reality Entertainment Inc. Gipaneguro gyud sa aktor ang pagtuman sa health protocols.

Tourism jingle sa San Remigio ginama ni Fr. Lyndon

Ang award-winning composer nga si Father Lyndon Ruiz maoy nigama sa opisyal nga jingle sa turismo sa Lungsod sa San Remigio sa Probinsya sa Sugbo.

Sa maong awit, detalyado nga gihulagway ni Father Lyndon ang katahom ug kahugyaw sa maong lungsod.

Nasayran nga nagbaha ang nindot nga mga talan-awon sa San Remigio, kini sama sa hamugaway nga mga resort , lami nga kan-anan ug ang maka-relax nga kabukiran.

"Mapasalamaton ko ni San Remigio Mayor Mariano Martinez nga nihatag siya og pagsalig nako alang sa paghimo sa ilang tourism jingle," suma pa ni Father Lyndon.

Si Nendil Endrina  ang arranger  sa maong tourism jingle.

Pipila sa gipasikat nga  mga awit ni Father Lyndon mao ang "Nalumos sa Sabaw" ug "Gubot Pa Sa Lukot" nga puros nagmadaogon sa mga nangaging  Cebu Pop Music Festival.