Bugoy, “batang ama”

CEBU, Philippines — Giangkon sa 18-anyos nga si  Bugoy Carino sa iyang Father’s day post sa Instagram nga dili gyud lalim ang mamahimong “batang” ama.”   "Mahirap maging batang ama pero gusto ko sabihin at ipagmalaki na proud ako kasi pinanindigan ko at hindi ko tinakbuhan ang responsibilidad ko.

"Kaya para sa anak ko at pamilya ko gagawin ko ang lahat maging maganda lang ang buhay natin. Mahal na mahal kita BABY SCARLET!”

Tulo ka tuig na ang anak nila ni Bugoy ug sa 23-anyos nga volleyball star nga si EJ Laure. Daghang ni-bash sa ilang relasyon sanglit menor de edad pa si Bugoy niadtong gihimugso ni EJ ang ilang anak.

Apan niya pa, pag-abot ni Scarlet sa iyang kinabuhi, “lahat ng problema lahat ng sakit na sinasabi ng ibang tao, lahat yun nawala."

Gibutyag sab ni Bugoy nga nausab gyud ang iyang kinabuhi, apan pagkahimo niyang amahan, "Naging madiskarte ako, naging kuripot, naging mauunawain at naging mas matatag.”

Gilatid gyud sa kapalaran

Daghan ang nahugyaw sa Father’s day post ni Maxene Magalona, diin gilab-as niya ang panahon nga buhi pa ang ilang amahan nga si Francis M. Kini kay usa sa mga dili malimtan ni Maxene mao ang panahon nga nag-shoot silang tibuok pamilya og commercial alang sa usa ka Cola brand.

Paghinumdum ni Maxene nga sa maanindot kini nga balay sa Makati gipahigayon. Ang maong balay gipanag-iya sa ilang ninong sa kasal nga si Keren Pascual.

Matud ni Maxene, usa ka adlaw niana, may-ni-tag niya og throwback photo sa maong commercial. Gipakita niya kini ngadto sa iyang bana nga si Rob Mananquil. Pagkakita sa model nga si Mananquil sa hulagway, giingnan niya si Maxene nga ang painting nga makita sa ilang likod, iyahang obra.

Nakugang ug nahugyaw kaayo si Maxene kabahin niini ug kumbinsido siya nga maanindot gyud ang mga pamaagi sa Ginoo ug nga gibendisyonan gyud niini ang ilang kaminyuon ni Mananquil.

Sukad niadto, ilaha na nga gibutang ang maong painting sa sala sa ila karong balay ni Mananquil.

“This is 36”

Viral na karon ang birthday post ni Camille Prats Yambao nga iyang gi-upload sa facebook niadtong June 20, 2021. “This is 36”, ra ang caption ni Camille sa iyang hulagway diin makita ang nindot gyud nga resulta sa iyang usa ka tuig nga exercise ug pagkaon og husto. Ang nakanindot kay ang maong post nahimong luna aron mag-post sab ang netizens sa ilang tagsa-tagsa ka hulagway nga himsog ug baskog sab sila og lawas bisan pa og kapin 60 na ang pangidaron sa pipila. Kagahapon, aduna na kini 83K (heart ug like) reactions, 2.1K comments ug 284 shares.

Dili makigtigi

Dili makigtigi si Arabella Davao sa iyang ig-agaw nga si Janine Gutierrez karon nga hingpit na siya nga nasulod sa showbiz isip usa sa labing bag-ong sakop sa Star Magic. Suma pa niya, managlahi sila og abilidad ni Janine busa dili kinahanglan nga magtigi sila. Mas makaayo hinuon kini niya sanglit mahimo siyang magpatabang sa iyang ig-agaw kabahin sa acting. Kamanghuran nga anak nila ni Jackie Lou Blanco ug Ricky Davao si Arabella. Managsama og inahan sila si Jackie Lou ug Monching Gutierrez nga mao si Asia’s Diva Pilita Corales, hinungdan nga manag-agaw si Arabella ug Janine.

“Normal life”

Gipaambit ni Megastar Sharon Cuneta sa iyang latest vlog nga sa usa mga rason nganong nauyon kaayo siya sa Amerika mao nga aduna siyay normal life didto sanglit dili daghan ang mga nakaila niya didto sukwahi sa iyang kinabuhi sa Manila. “Maaaring sa inyo no big deal, sa akin po, ito ang paborito ko — ‘yung nagagawa ko ‘yung lahat ng normal na bagay na tinetake niyo for granted. Sa akin, sobrang special kasi iba ang buhay namin sa Manila.”

Walay apil si Dennis

Daghan na sab ang ni-bash karon kang Julia Barretto human siya nag-upload og hulagway niya kauban ang iyang apohan nga lalaki ug hulagway sab nga kauban niya si Ian Veneracion niadtong Father’s day. Si Ian ang amahan ni Julia sa teleserye nga “A Love To Last” sa ABS-CBN kaniadto diin nakauban pud niya si Bea Alonzo. Walay caption si Julia sa maong mga hulagway. Apan gi-bash siya sanglit walay hulagway nga kauban niya ang iyang amahan gyud nga si Dennis Padilla.

Boto kang Devon?

Gi-intriga sa netizen’s ang Father’s day post ni Devon Seron diin kauban niya ang iyang amahan. Kini human ni-komento si Chesca Diaz og, “happy father’s day, truly you raised a good and loving daughter.” Nagpasalamat si Devon kang  Chesca. Naintriga ang netizens sanglit si Chesca maoy inahan sa ex-boyfriend ni Devon nga si Kiko Estrada nga karon giingong uyab na si Heaven Peralejo—ang co-star sa nahauna nga gitumbok nga maoy rason sa break-up sa nilabay nga tuig. Suma pa sa netizens, ang komento ni Chesca daw nagpasabot nga boto gyud kini kang Devon kaysa kang Heaven.