Nakulbaan ang fans

Managlahi ang reaction sa mga Pinoy pageant fans sa performance ni Miss Universe Philippines Rabiya Mateo sa Preliminary Competition kagahapon diin nagtigi ang tanan kandidata sa ilang swimsuit ug evening gown.

Adunay gikuyawan sanglit dili matud pa maayo ang performance ni Rabiya sa evening gown. Suma pa, dili haom niya ang iyang hairstyle ug medyo ngitngit siya tan-awon. Mora matud pa siya og potot pud sa maong gown. May mga nakuyawan basin og dili makarga si Rabiya sa semifinals round. Dako hinuon ilang pagtuo nga imposibli kun dili siya malakip sa Top 21 candidates.

Pero may mga nipakpak sab kang Rabiya, ilabi na sa swimsuit portion. Angayan ug husto ra matud pa ang iyang aura didto. Dili kiat, dili sab luya.

Ang Cebuano-designer pero Dubai based nga si Furne One Amato ang nagmugna sa evening gown ni Rabiya.