CEBU, Philippines — Nag-sorry si Miss Universe Philippines Rabiya Mateo ngadto sa mga Pinoy fans nga nadismaya sa iyang national costume nga mugna sa world-class fashion designer nga si Rocky Gathercole kinsa nipanaw niadtong Marso.
Blue ug red ang mga colors sa natcos ni Rabiya, mao usab ang iyang footwear. Adunay tulo ka mga bituon. Apan nasayran nga aduna kini headpiece nga porma og adlaw nga mugna sa jewelry maker nga si Manny Halasan. Wala masul-ob ni Rabiya ang nahisgutang headpiece hinungdan nga may mga fans nga nadismaya sanglit wala nakompleto ang mga element sa Philippine flag.
May mga nakuwangan sab sa performance ni Rabiya ug nikomento nga bug-at ra kaayo ang mga pako ni Rabiya hinungdan nga wala kaayo siya makarampa og maayo. Ang uban nagkanayon nga national costume competition ang nahitabo ug dili Victoria’s Secret fashion show hinungdan nga wala nahaom ang desinyo sa costume sa pambato sa Pilipinas.
Dinhi nangayo og dispensa si Rabiya.
“I'm sorry kung na-disappoint man kayo sa akin. I know na I did my best, I even cut my finger and 'yung stockings ko punong-puno na din ng dugo, but I kept fighting," nagkanayon si Rabiya nga naghilak.
Samtang si MUP national director Shamcey Supsup nibutyag nga wala na lang ipasul-ob kang Rabiya ang headpiece sanglit magsige kini og kahug. Gawas pa, bug-at na daan ang mga pako ni Rabiya sanglit nitimbang kini og 21 kilos.
Atol sa 68th Miss Universe pageant, si Gazzini Ganados maoy nidaog sa best in national costume award diin mugna sa Sugbuanong si Cary Santiago ang iyang gisul-ob.
Ang 69th Miss Universe Coronation Night mahitabo karong Domingo (Lunes dinhi sa atua), didto sa Florida, USA.
Catriona, gi-bash; Thailand, Malaysia, gi-abibahan!
Nag-trending ang 4th Pinay Miss Universe nga si Catriona Gray kagahapon human niya gi-tweet ang iyang top 6 sa national costume competition. Wala malakip ang costume ni Rabiya sa mga nauyonan ni Catriona. Hinuon, wala sab siya'y gisulting negatibo sa costume niini.
Indonesia, Nepal, Peru, Thailand, Ukraine, ug Vietnam ang top 6 para kang Catriona. Dinhi na nabahin ang reaksyon sa netizens.
May mga niingon nga opinion ni Catriona ang iyang tweet hinungdan nga angayan kining tahuron. May mga niingon sab nga angayan unta nga nagpakita lang gihapon og suporta kang Rabiya si Catriona bisan wala malakip sa iyang top 6 ang costume niini.
Suma pa sa uban, unta wala na lang gi-tweet sa kanhi beauty-queen ang iyang choices. Una niini, sa wala pa magsugod ang national costume competition, nanawagan si Catriona og suporta para kang Rabiya.
“Friends! Let's send prayers up for our very own Ms Philippines #RabiyaMateo tonight as she prepares for the Closed Door Interview and National Costume show for Miss Universe,” nagkanayon siya.
Nipakpak sab si Catriona sa determinasyon nga gipakita ni Rabiya kay niya pa dili lalim ang kapin 20 kilos nga gibug-aton sa costume niini. Naghinamhinam na matud pa siya sa pasabog ni Rabiya sa preliminaries diin magtigi ang mga kandidata sa best in swimsuit ug best in evening gown.
Niining bag-o lang, may mga ni-bash sab kang Catriona kay wala gyud matud pa nipalanog og suporta para kang Rabiya sukwahi sa gibuhat ni 2015 Miss Universe Pia Wurtzbach nga nagpahuwam kang Rabiya sa iyang gisul-ob nga ariyos niadtong siya pa ang nakigtigi unom ka mga tuig na ang nilabay.
Apan nitubag si Catriona nga dili kinahanglan nga ibandilyo ang pagsuporta. Gipadayag matud pa niya ngadto kang Rabiya ang iyang pagsuporta niini sa pribadong pamaagi.
“Kayang-kaya mo ’yan, Rabiya!”
Nanawagan si Miss Grand International 2020 first runner-up Samantha Bernardo nga ihunong na ang pagsige og sabong niya batok kang Miss Universe Philippines Rabiya Mateo kay managlahi matud pa sila og dalan nga gisubay.
“Rabiya and I have been communicating through social media. It was also a chance to clear the air because people have been comparing [us]. Iba ang laban ko, iba rin ang journey niya, so please stop the hate. She’s already there. Let’s all unite for Rabiya and let’s all help her get another Miss Universe crown for the country!”
Si Bernardo, namulong niini dihang na interview sa ABS-CBN News atol sa 61st anniversary of the Philippines Association of Real Estate Boards (PAREB) niadtong Huwebes.
Mensahe niya alang kang Rabiya: “Kayang-kaya mo ‘yan Rabiya, para sa Pilipinas! Huwag na lang natin pansinin ang negativity.”