Gikasal na gyud diay

CEBU, Philippines — Nalamdagan na ang pagduda sa nilabay nga mga adlaw nga  matud pa gikasal na sila si Luis Manzano ug Jessy Mendiola. Nagsugod kini dihang nikomento si Luis sa post ni Angeli Pangilinan mga duha ka semana na ang nilabay human nahibaw-an nga nag-Covid positive ang asawa ni Gary V.

Tubag ni Angeli sa madasigong mensahe ni Luis, best wishes to you and the wife.

Ug niadtong Domingo, alas siete sa gabii, hingpit na nga natin-aw ang tanan pinaagi sa latest vlog ni Jessy: Usa ka bulan na silang magtiayon.

Gikasal sila niadtong February 21, 2021, pinaagi sa usa ka civil wedding, didto sa The Farm at San Benito sa Lipa City, Batangas. Ang mayor sa maong dakbayan nga si  Eric B. Africa maoy nagkasal nila, diin mga 20 kabuok lamang ang bisita nga gilangkuban sa tagsa-tagsa nila ka mga pamilya ug mga higala nga dili taga showbiz.

Saysay nila sa exclusive interview sa PEP, kalit-kalit lamang ang ilang desisyon. Sa  June gyud unta ang ilang church wedding, apan nausab ilang plano ug nihukom nga mag-civil wedding lamang una sila. Sa December puhon na ipahigayon ang ilang church wedding.

Pagpasabot ni Luis ngadto sa PEP: "Biglaan lang ang civil wedding because, honestly, nothing is certain, but we do not regret one single bit of our decision.

"Halos three weeks lang ang preparation namin.

"Salamat sa organizer/ coordinator and friend namin na si Joanne Angeles. Nagawa niya lahat ng pag-aasikaso at pagmo-mount ng wedding."

First runner-up na pud!

Sa ikaduhang higayon, first runner-up ang pambato sa Pilipinas sa Miss Eco International pageant .

Si Kelley Day, nga maoy pambato sa Pilipinas karong tuiga, nanghinaot nga mapasigarbuhon ang mga Pinoy sa iyang kadaugan.

Si Giselle Uys nga gikan sa South Africa maoy nakoronahan atol sa pageant niadtong Domingo sa gabii didto sa Baron Resort Sharm El Sheikh sa nasud sa Egypt.

Si Miss USA Alexandria Kelly maoy second runner-up, samtang ang pambato sa Venezuela Stefania Rodriguez ug si Miss Costa Rica Kristell Ruiz maoy third ug fourth runners-up. Si Kelley nga na-interview sa pageant website Missosology human gyud sa pageant, nipadayag nga mapasalamaton kaayo siya sa iyang kadaugan ilabi na nga daghan kaayong mga angayan ug lig-on sab nga mga kandidata nga iyang gikatigi.

Malipayon sab siya nga si Uys ang narayna.

"South Africa is so deserving. She really has been extremely hard working throughout the entire competition. And I'm really happy that siya ang nanalo, as well.

"You know, honestly, so many girls here really deserved it so I'm just really blessed to be in the second position," nagkanayon siya ngato sa Missosology.

Ikatulong higayon na kini nga naa gyud ang Pilipinas sa top 2 sa maong pageant. Niadtong 2019, ang pambato sa nasud nga si Maureen Montagne, gideklara sab nga first runner-up. Ug niadtong 2018, sa pagsugod gyud sa maong pageant, ang pambato sa Pilipinas nga si Cynthia Thomalla, kinsa karon Kapuso star na, mao gyud ang narayna.

Sa nilabay nga semana, first runner-up sab ang pambato sa Pilipinas nga si Samantha Bernardo sa Miss Grand International pageant didto sa Thailand.

Nangailad uy!

Prank o binuang ra diay. Naukay ang mga mahiligon og showbiz news niadtong Domingo gumikan sa gi-post ni Arci Munoz sa Instagram nga may caption nga “from bestfriends to lovers,” diin nangutana sab si JM de Guzman kun mahimo ba siyang mangulitawo sa iyang suod nga higala nga mao ang aktres. Sa vlog ni Arci kagahapon sa udto nga may gitas-on nga kapin unom ka minutos, nasuta nga komedya ra diay kadto ug engagement gyud diay kadto sa manghod ni Arci nga si Manolet  ug sa hinigugma niini nga si Kris Lontoc.