Breast reduction?

CEBU, Philippines — Nag-online Q&A si 2015 Miss Universe Pia Wurtzbach kauban ang iyang mga follower sa Instagram, ug usa sa mga pangutana kun plano ba niya nga pagamyan iyang dughan. Tubag niya, "There was a time when I was much younger that I was thinking about it but then hindi ko siya tinuloy kasi nalaman ko na malaki 'yung mga scars na maiiwan niya so buti na lang."

Sassy Girl

Human sa 20 ka mga tuig pagpasalida dinhi sa Pilipinas, himoan og Pinoy version ang sikat nga Korean romantic-comedy My Sassy Girl ug si Toni Gonzaga maoy bida niini. Ang TinCan Productions, ang film outfit sa bana ni Toni nga si Paul Soriano maoy mogama niini.

Fil-Am na sab!

Nagmaya karon ang fil-am nga si Olivia Rodrigo human siya nimugna og kasaysayan sa Billboard 100 sa nilabay nga adlaw. Kini kay ang iyang kanta nga “Driver’s License” nag-#1 sa tibuok kalibutan sulod lamang sa us aka semana sukad sa pag-release niini ug mao sab ang labing gi-stream sa Spotify.  Si Olivia kasamtangang makita sa High School Musical: The Series isip Nini Salazar Roberts. Ang Driver’s License ang iyang unang single human siya nipirma ubos sa  Interscope Records ug Geffen Records sa nilabay nga tuig. Pinoy ang dugo sa amahan ni Olivia.

Nganong nibiya si Mr. M?

Nanluod dalang kahiubos ang rason ni Mr. M o Johnny Manahan sa pagbiya niya sa ABS-CBN human sa 35-40 years nga pagpasilong sa maong network.

Sa exclusive interview sa PEP kang Mr. M sa nilabay nga adlaw, nasuta nga ang gihulagway niya nga “shadow talent center” maoy rason sa iyang pagbiya. Nasayran nga diha gihapon si Mr. M sa ABS-CBN, bisan paman niadtong gibasura na ang franchise renewal application sa estasyon.

Niabot sa punto nga nahimo na nga kumpetensya sa Star Magic ang “shadow talent center.”

Prangka niyang pamahayag: "There's a shadow talent center in ABS-CBN, and they have their own managers and they manage their own stars.

"The people from the Pinoy Big Brother, we expected to manage these people after they come out of the house.

"No, they set up their own organization. It was like a counter organization."

Suma pa niya, iya nang gipadayag ngadto sa management ang iyang pagsupak niining maong “shadow talent center”  apan walay action matud pa, sulod sa tulo ka mga tuig.

Hinungdan nga dihang gitanyagan siya sa tag-iya sa Brightlight Productions nga si Albee Benitez aron mamahimong director sa Sunday Noontime Live nga gisalida nila sa TV5 sugod niadtong October 18 hangtud January 17, gidawat kini ni Mr. M, ug nibiya siya sa ABS-CBN.

Si Mr. M kauban ang kanhi president sa estasyon nga si Freddie Garcia, maoy nagmugna sa Star Magic, 28 ka mga tuig na ang nilabay. Naila kaniadto isip “Talent Center” mao kini ang gigikanan sa mga labing sikat nga talents sa ABS-CBN sama nila ni Piolo Pascual, John Lloyd Cruz, Bea Alonzo, Angelica Panganiban, Daniel Padilla, Kathryn Bernado ug daghan pa.

“Better Together”

Pormal na nga gipahibawo sa TV5 nga sugod karong Domingo, January 24, makita na sa estasyon ang longtime running variety show sa ABS-CBN, ang ASAP Natin To.

Sa usa ka press statement gipahibawo sa TV5 nga partnership kini tali sa Cignal, ABS-CBN, TV5 ug Brightlight Productions.

Alas 12 sa udto molugwa ang ASAP Natin To hangtud alas dos sa hapon. Sundan kini sa D King FPJ movies hangtud sa alas kwatro sa hapon. Kahinumduman nga ang katungod pagpasalida sa mga pelikula ni anhing Fernando Poe kaniadto, nakuha sa ABS-CBN.

Una na nga gibalita nga padayon gihapong makita ang ASAP sa A2Z Channel ug sa nagkadaiyang social media platforms sa ABS-CBN.