Anak diay

CEBU, Philippines — Kalmado nga gitubag ni Cherrie Pie Picache ang usa ka netizen nga ni-akusa niya nga usa ka cougar. Ang cougar nagpasabot nga ang edaran nga babaye nakigrelasyon og batan-ong lalaki. Nahitabo kini dihang gi-upload ni Cherrie Pie sa Instagram ang iyang hulagway samtang naligo og dagat ug may kauban nga batan-ong lalaki. “Love building memories with this man”, ang caption ni Cherrie Pie sa hulagway. Reaction sa netizen: You cougar, you. Good for you. Enjoy life to the fullest.” Kalmadong tubag ni Cherrie Pie: He is my son and the only man in my life.

Congratulatory Dinner

Nakigpanihapon si ABS-CBN executive Deo Endrinal nila ni Janine Gutierrez  ug Paulo Avelino sa nilabay nga adlaw. Gihulagway kini sa manager sa duruha nga si Leo Dominguez nga “congratulatory dinner”, busa pagtuo sa mga netizen gumikan kini kay na best actress si Janine sa Famas ug Gawad Urian, samtang best actor sab si Paulo sa Metro Manila Film Festival. Wala pa mahisguti kanus-a pormal nga mopirma og kontrata sa Kapamilya network si Janine.

Balay ni Xian, gilungkab

Gilungkab ang balay ni Xian Lim ug giharos pagdala ang mga TV ug computers. Gibuak ang bildo nga bintana. Matud ni Xian nga may gibilin pa nga biste ang mga nangawat nga gibana-bana sa kapolisan nga upat ka mga tawo. Sa sinungdanan matud pa napungot siya og maayo, apan iyang nahunahuna nga maayo na lang kay walay dautang nahitabo sa iyang lola ug lolo. Ang Ginoo na lamang matud pa maoy bahala sa mga criminal.

Proud Lola

Nag-post na og hulagway si Jenine Desiderio nga nagkugos sa iyang apo nga si Jude Trevor Paterson. Caption ni Jenine sa maong hulagway kay, My new job: Yaya.  Mga September sa milabay nga tuig dihang nilupad paingon sa UK si Jenine kauban sa manghod ni Janella, ug nibuto ang taho nga kini tungod kay gitakda nga manganak ang young actress niadtong October. Basis a hingpit nga pagpaila nila ni Janella ug Markus Paterson sa ilang anak, October 20, 2020 nanganak ang young actress.

Ikaw na Heart!

Dili gihapon makatuo si Heart Evangelista nga nilugwa ang iyang dagway sa New York Times Square niadtong nilabay nga adlaw diin gibandera niya ang bag nga iyang gi-endorse. Apan suma pa niya, nalipay kaayo siya nga nasud-ong ang maong bag didto sa Amerika aron makita sa kalibutan unsa ka maanindot ang talentong Pinoy sanglit Filipino brand man ang mao niyang endorsement.

Viva talent na

Mipirma og management contract sa Viva Artist Agency si Rossana Roces sa dayong tapos sa tuig 2020. Nahugyaw siya nga sa edad nga 49, nagka interes pa ang Viva niya. Pero giingnan matud pa siya sa Viva nga usik ang iyang estado kun dili niya pahimuslan sanglit icon na matud pa siya pelikula. Posibli nga aduna siyay product endorsement ug magsuwat sab siyag libro ubos sa maong management contract.

Nagkahiubsanay?

Nag-away matud pa sila si Coco Martin ug Yassi Pressman hinungdan nga tangtangon na ang aktres sa FPJ’s Ang Probinsyano. Kini maoy tsika nga nahipos ni Ogie Diaz. Si Jane de Leon ang gitakda nga musulod sa maong longtime action series ug mamahimong bag-ong love interest ni Coco.

Encounter

Himuon sa TV5 ug Viva Entertainment ang Pinoy adaptation sa Korean hit series nga Encounter nga unang gisalida sa ABS-CBN kaniadto. Gibituonan ang original version nila ni Song Hye Kyo ug Park Bo Gum.

Kabit-Kabit na pud

Kumpirmado nga nakuha sa ABS-CBN ang rights sa UK hit series nga Dr. Foster aron mahimuan og Pinoy adaptation. Ang maong serye maoy gibasehan sa toptrending Kdrama nga World of The Married Couple nga gisalida sab sa ABS-CBN. Gawas sa Korea gihimuan sab kini’g version didto sa India, Russia, ug Turkey.

Wow, Dimples!

Gitakdang mobukas og restaurant didto sa Singapore si Dimples Romana didto sa Singapore. Sa usa ka IG post, gipakita ni Dimples ang mga pagkaon nga maoy ilang itanyag ngadto sa publiko.  Pagatawgon og Alegria Singapura, non-traditional Latin-Asian ang mga pagkaon sa maong restaurant.