Dili Patyon

Gipasalig ni direk Gina Alajar nga dili mamatay o wagtangon ang character nga Len Len nga gihatagan og kinabuhi sa 14 anyos nga si Sofia Pablo sa GMA 7 teleseries nga Prima Donnas. Suma pa niya,kanunay nga gihisgutan si Len Len sa mga bag-ong episodes sa Prima Donnas nga ipasalida na sugod karong November 9.  Nasayran nga wala paapila sa taping si Sofia sa pagbalik na og trabaho gumikan sa IATF guideline nga walay 14 anyos paubos nga mahimong motrabaho gawas sa balay nunot usab sa pandemya.

Pagbuot sa Ginoo

Sugod niadtong Huwebes, nadungog na pinaagi sa Spotify ang awit nga “Titulo” nga gikanta ni The Clash Season 2 champion Jeremy Tiangco. Ang maong awit nga ginama nila ni Vehnee Saturno, Ebe Dancel, Jungee Marcelo, ug Top Suzara, giandam sa nilabay nga tuig alang sa modaog sa nahisgutang GMA7 singing contest.  Samtang, sa mga komento nga wala pa mosulbong ang career ni Jeremy ug sa labing unang The Clash champion nga si Golden Canedo, nagkanayon si Jeremy nga wala siya magdali ug magpaabot siya sa gitana sa Ginoo para niya.